AQSH prezidenti Donald Tramp 11-avgust kuni kannabis (marixuana)ni uncha xavfli bo‘lmagan dori vositasi sifatida qayta tasniflashni ko‘rib chiqayotganini ma’lum qildi. Bu haqda Al Jazeera xabar berdi.
Tramp Oq uyda jurnalistlar bilan muloqot chog‘ida tegishli masala bo‘yicha qarorni yaqin haftalarda qabul qilishini bildirgan.
“Umid qilamanki, bu to‘g‘ri qaror bo‘ladi. Bu juda murakkab mavzu”, dedi AQSH rahbari.
Prezident tibbiy maqsadlarda ishlatiladigan kannabis haqida “yaxshi gaplar” eshitganini, biroq uning boshqa jihatlari borasida salbiy fikrlar ham mavjudligini aytgan.
“Ba’zilar uni yoqtiradi, ba’zilarga butunlay yoqmaydi. Chunki ular kannabis bolalarga ham, kattalarga ham birdek zararli deb hisoblaydi”, dedi prezident.
Trampning ushbu bayonotidan so‘ng kannabis ishlab chiqaruvchi kompaniyalar aksiyalari keskin ko‘tarilgan. Nyu Yorkdagi Tilray Brands aksiyalari qariyb 42 foizga oshgan, Kanadaning Village Farms International va Canopy Growth Corp kompaniyalari esa mos ravishda 34 va 26 foiz o‘sishni qayd etgan. The Wall Street Journal xabariga ko‘ra, Tramp yaqinda o‘tkazilgan xayriya kechasida ham kannabisni qayta tasniflash rejalari borligini bildirgandi.
Hozirda AQSHning 24 ta shtatida kannabisni rekreatsion maqsadlarda ishlatish to‘liq qonuniy bo‘lsa-da, undan foydalanish va saqlash federal jihatdan noqonuniy hisoblanadi. Kannabis hozirda giyohvandlikka qarshi kurashish boshqarmasi ro‘yxatiga kiritilgan bo‘lib, u geroin, LSD va ekstazi bilan bir toifada turadi. Bu turdagi moddalarga “tibbiy foydalanish uchun tasdiqlanmagan vositalar sifatida qaraladi.
Sobiq prezident Jo Bayden kannabisni “jismoniy va psixologik qaramlik xavfi o‘rtacha yoki past” vositalar qatoriga kiritishni taklif qilgan edi. Biroq bu tashabbus uning prezidentlik muddati yakunigacha amalga oshmay qolib ketgan.
Kannabis — nasha oilasiga mansub o‘simlik bo‘lib, uning turli qismlaridan turli maqsadlarda foydalaniladi. Uning asosiy faol moddasi tetrahidrokannabinol (THC) bo‘lib, u psixotrop ta’sirga ega.
Marixuana — kannabis o‘simligining quritilgan bargi, guli va poyasidan tayyorlanadigan psixotrop vosita. Uni ko‘pincha chekish yoki hidlash orqali iste’mol qilishadi.
Ushbu dori vositalaridan tibbiyotda og‘riqni kamaytirish, ko‘ngil aynishini bartaraf etish, ayrim nevrologik kasalliklarda simptomlarni yengillashtirish maqsadida foydalaniladi.
Izoh (0)