Rossiya Jazoni ijro etish federal xizmati xodimi leytenant Aleksey Akchurin bir yarim yilga shartli ravishda ozodlikdan mahrum etish jazosiga hukm qilingan va ikki yillik sinov muddati belgilangan. U tergov izolyatoridagi ayolga taqiqlangan narsalar olib kirib bergan. Bu haqda “MK.ru” xabar berdi.
Moskvaning Lyublin tuman sudi Akchurinni mansab lavozimini suiiste’mol qilganlikda aybdor deb topgan.
Xabar berilishicha, Reana Teymurova ismli ayol erkaklarga sportli klofelin quyib berib, uning ta‘siri ostida qolganlarni o‘margan. Teymurovaning harakatlaridan jabrlangan bir kishi halok bo‘lgan. 2017-yilda Lyublin tuman sudi ayolni 12 yilga qamoq jazosiga hukm qilgan. Akchurin ayol tergov izolyatorida bo‘lgan vaqtda unga narsalar tashib turgan.
Teymurova tergov izolyatorida bo‘lgan vaqtda Akchurin unga internetga ulana oladigan 18 ta mobil telefon kiritib bergan. Biroq ayol boshqa narsalarni yetkazib berishni ham so‘ragan.
Akchurin tomonidan izolyatorga olib kirilgan narsalar orasida javohirli tilla ziraklar, bir nechta atir, tibbiy preparatlar bo‘lgan.
Bundan tashqari, leytenant ayol uchun “ijodiy materiallar“ — qurilish iskanasi, rasm chizish uchun bo‘yoqlar, mo‘yqalam va yelim yetkazib bergan. Har safar buyumlar yetkazib berilganidan keyin Teymurovaning qarindoshi Akchurinning shaxsiy bank hisobraqamiga 20—30 ming rubl o‘tkazgan. Bu fakt unga qarshi jinoiy ishda asosiy dalil bo‘lgan. Akchurinning o‘zi aybini tan olgan va jazoni yengillashtirishni so‘ragan.
Izoh (0)