Qozog‘iston prezidenti Nursulton Nazarboyev O‘zbekiston mustaqilligi kuni munosabati bilan mamlakat rahbari Shavkat Mirziyoyevga tabrik yo‘lladi. Bu haqda Prezident matbuot xizmati xabar berdi.
Tabrikda Nursulton Nazarboyev o‘z hamkasbini va O‘zbekiston xalqini Mustaqillik kuni munosabati bilan o‘zi va Qozog‘iston xalqi nomidan chin qalbdan tabriklagan.
Qozog‘iston prezidenti o‘z tabrigida O‘zbekistonning mustaqillik yillarida davlatchilikni mustahkamlash, xalq farovonligini yaxshilash va mamlakatning xalqaro maydondagi imijini oshirish yo‘lida erishgan yuqori natijalarini qayd etib o‘tgan. Nursulton Nazarboyev O‘zbekiston Shavkat Mirziyoyev rahbarligi ostida o‘zining taraqqiyot yo‘lini davom ettirishini va buyuk maqsadlariga yetishishini tilagan.
Yil sayin ikki mamlakat o‘rtasidagi umumiy ma’naviy qadriyatlar, ko‘p asrlik an’anaviy do‘stlik va mustahkam hamkorlikka asoslagan munosabatlar mustahkamlanib borayotgani ta’kidlangan.
Qutlovda mamlakatlar o‘rtasidagi munosabatlar rivojiga turtki bo‘luvchi hamkorlikdagi faoliyat ikki davlat taraqqiyotida garov bo‘lishiga ishonch bildirilgan.
Nursulton Nazarboyev Shavkat Mirziyoyevga mustahkam sog‘lik va tuganmas kuch-quvvat, faoliyatida katta muvaffaqiyatlar, birodar O‘zbekiston xalqiga esa tinchlik va farovonlik tilagan.
Bundan tashqari, Shavkat Mirziyoyevni boshqa bir qator davlat rahbarlari ham tabriklagan. Xususan, Qirg‘iziston prezidenti Sooronboy Jeenbekov, Belarus prezidenti Aleksandr Lukashenko, Germaniya prezidenti Frank-Valter Shtayenmayer, hindiston prezidenti Ram Nath Kovind Shavkat Mirziyoyevga tabrik yo‘llagan.
Izoh (0)