Bosh prokuraturada AQSh Federal qidiruv byurosi direktori o‘rinbosari Devid Boudich boshchiligidagi delegatsiya a’zolari qabul qilindi. Bu haqda “Xalq so‘zi” xabar bermoqda.
Ikki idora o‘rtasida o‘rtasida o‘tgan yil dekabr oyida anglashuv memorandumini imzolangandi. May oyida esa Prezidentning AQShga rasmiy tashrifi doirasida aloqalarni yanada rivojlantirishga qaratilgan “Yo‘l xaritasi” tasdiqlandi.
Muloqot chog‘ida mehmonlar samimiy qabul uchun minnatdorlik bildirdi. Har ikki idora o‘rtasidagi samarali hamkorlik davom etishi qayd etildi.
“Bu kabi amaliy aloqalarning muhimligi shundaki, bunda har ikkala tomon uchun ham foydali bo‘lgan konstruktiv munosabatlarga asos solinadi. Istiqbollar va aniq sohalar haqida to‘xtaladigan bo‘lsam, ulardagi davomiylik ko‘pgina yo‘nalishlarni qamrab oladi. Avvalo, terrorizm tahdidiga qarshi kurashish, bu eng asosiysi. Kelgusida davlatlar o‘rtasida ma’lumotlar almashib turish uchun o‘ziga xos axborot yo‘lagini tashkil etish ham muhim. Bu o‘ta muhim. Negaki, biz o‘zaro qanchalik axborot almashsak, davlatlarimiz xavfsizligi nuqtai nazardan shuncha ko‘p ish qilgan bo‘lamiz. Qolaversa, odam savdosiga qarshi kurashish, xalqaro uyushgan jinoyatchilik, giyohvand moddalar savdosiga qarshi kurash bo‘yicha ham hamkorligimizni kuchaytiramiz. Afsuski, bu tahdidlar hammamiz uchun birdek xavf tug‘dirmoqda” — deydi Devid Boudich.
Muzokaralar davomida jinoyatchilikka qarshi kurashish, tergov jarayonlarida hamkorlik qilish hamda birgalikda treninglar o‘tkazish kabi masalalar atroflicha muhokama etildi.
Bu boradagi ilk qadamlar shu yilning aprel oyidayoq tashlangan bo‘lib, favqulodda vaziyatlarda qidiruvga bag‘ishlangan haftalik kurslar tashkil etilgan edi. Unda Byuroning maxsus agentlari va ekspertlari portlovchi moddalar bo‘yicha tajribalari bilan o‘rtoqlashib, portlash holatlarida uning manbalarini aniqlash, isbotlash yuzasidan amaliy va nazariy mashg‘ulotlar o‘tkazildi.
Uchrashuvda tuzilmalar o‘rtasidagi hamkorlik bundan buyon ham amaliy tusda davom etishi ta’kidlandi.
Izoh (0)