Бош прокуратурада АҚШ Федерал қидирув бюроси директори ўринбосари Дэвид Боудич бошчилигидаги делегация аъзолари қабул қилинди. Бу ҳақда «Халқ сўзи» хабар бермоқда.
Икки идора ўртасида ўртасида ўтган йил декабрь ойида англашув меморандумини имзоланганди. Май ойида эса Президентнинг АҚШга расмий ташрифи доирасида алоқаларни янада ривожлантиришга қаратилган «Йўл харитаси» тасдиқланди.
Мулоқот чоғида меҳмонлар самимий қабул учун миннатдорлик билдирди. Ҳар икки идора ўртасидаги самарали ҳамкорлик давом этиши қайд этилди.
«Бу каби амалий алоқаларнинг муҳимлиги шундаки, бунда ҳар иккала томон учун ҳам фойдали бўлган конструктив муносабатларга асос солинади. Истиқболлар ва аниқ соҳалар ҳақида тўхталадиган бўлсам, улардаги давомийлик кўпгина йўналишларни қамраб олади. Аввало, терроризм таҳдидига қарши курашиш, бу энг асосийси. Келгусида давлатлар ўртасида маълумотлар алмашиб туриш учун ўзига хос ахборот йўлагини ташкил этиш ҳам муҳим. Бу ўта муҳим. Негаки, биз ўзаро қанчалик ахборот алмашсак, давлатларимиз хавфсизлиги нуқтаи назардан шунча кўп иш қилган бўламиз. Қолаверса, одам савдосига қарши курашиш, халқаро уюшган жиноятчилик, гиёҳванд моддалар савдосига қарши кураш бўйича ҳам ҳамкорлигимизни кучайтирамиз. Афсуски, бу таҳдидлар ҳаммамиз учун бирдек хавф туғдирмоқда» — дейди Дэвид Боудич.
Музокаралар давомида жиноятчиликка қарши курашиш, тергов жараёнларида ҳамкорлик қилиш ҳамда биргаликда тренинглар ўтказиш каби масалалар атрофлича муҳокама этилди.
Бу борадаги илк қадамлар шу йилнинг апрель ойидаёқ ташланган бўлиб, фавқулодда вазиятларда қидирувга бағишланган ҳафталик курслар ташкил этилган эди. Унда Бюронинг махсус агентлари ва экспертлари портловчи моддалар бўйича тажрибалари билан ўртоқлашиб, портлаш ҳолатларида унинг манбаларини аниқлаш, исботлаш юзасидан амалий ва назарий машғулотлар ўтказилди.
Учрашувда тузилмалар ўртасидаги ҳамкорлик бундан буён ҳам амалий тусда давом этиши таъкидланди.
Изоҳ (0)