Kattaqo‘rg‘onda 21 ta tadbirkor 7.1 mlrd so‘mlik sanoat loyihasini ishga tushuradi
Mamlakatimizning mustaqilligining 27 yilligi munosabati bilan O‘zbekiston Jurnalistlar ijodiy uyushmasi Samarqand viloyat bo‘limi hamda Kattaqo‘rg‘on tuman hokimligi, “Kattaqo‘rg‘on” haqiqati gazetasi hamkorligida tumanda olib borilayotgan islohotlar, bunyodkorlik va ishlab chiqarish sohasida bajarilayotgan ishlarga bag‘ishlangan press-tur tashkil etildi. Bu haqida “Daryo” muxbiri Farhod Norbo‘tayev xabar bermoqda.
Tadbir ishtirokchilarini tuman hokimi A’zamxon Bahromov kutib olib, ularga tumanda amalga oshirilayotgan ishlar xususida ma’lumot berib o‘tdi.
— Kattaqo‘rg‘onda juda katta ishlarni amalga oshirishni rejalashtirganmiz. Xususan, 2019—2029-yillar davomida tumanning ijtimoiy-iqtisodiy rivojlantirish konsepsiyasi ishlab chiqqanmiz. Ushbu konsepsiya asosida loyihalashtirilgan dasturlarimizni bosqichma-bosqich amalga oshirib, tuman aholisi ish bilan ta’minlash, ularni maroqli dam oladigan maskanlarni yaratish ko‘zda tutilgan,deydi — A’zamxon Bahromov.
2018-yilning yanvar—iyun oylarida tumanda 110 ta kichik biznes subyektlari yangidan tashkil etilgan bo‘lib, 21 ta tadbirkorlik subyektlarining muammoli masalalariga amaliy yordam berilib, faoliyati qayta tiklangan. Kichik biznesning tuman yalpi hududiy mahsulotidagi ulushi 90.4 foizni tashkil qilmoqda.
— Tumanimizning Payshanba massivida 1.2 gektar, Iska massivida 3.5 gektar maydonda kichik sanoat zonalari tashkil etilib, umumiy hisobda 21 ta tadbirkorlik subyektlari tomonidan qiymati 7.1 milliard so‘mlik loyihalar amalga oshirilmoqda, — deydi tuman hokimi.
Ushbu loyihalarni amalga oshirilishi natijasida 170 dan ortiq yangi ish o‘rinlari tashkil etiladi.
Joriy yilda tuman hududida ko‘mirda ishlaydigan, tejamkor 15 ta g‘isht zavodlari qurilishi rejalashtirilgan bo‘lib, bugungi kunda 5 ta zavod mahsulot ishlab chiqarishni boshlagan. Qolgan 10 ta g‘isht zavodlari yil oxiriga qadar ishga tushirilishi natijasida 500 ta yangi ish o‘rinlari yaratiladi.
Tumanning ijtimoiy-iqtisodiy ahvolini yaxshilash maqsadida noyabr oyiga qadar umumiy qiymati 2.4 million AQSh dollari miqdorida tikuv fabrikasi qurilishi bo‘yicha investorlar bilan kelishuvga erishilgan.
Mundiyon mahallasida joylashgan ushbu korxona ishga tushishi natijasida 1200 ta doimiy ish o‘rni yaratiladi. Mahsulotlar esa eksportga yo‘naltiriladi. Shuningdek, Xitoy investitsiyasi ishtirokida qiymati 340 million AQSh dollarini tashkil etuvchi, yillik quvvati 2.4 million tonna sement ishlab chiqaruvchi “Xengyuan sement” qo‘shma korxonasi qurilmoqda. Ikki bosqichda amalga oshiriladigan ushbu loyiha doirasda 1500 ta yangi ish o‘rnilari tashkil etilishi ko‘zda tutilgan.
Press-tur davomida jurnalist va ijodkorlar tumanda amalga oshirilayotgan barcha korxona va tashkilotlarni joyida ko‘rib, ularda amalga oshirilayotgan ishlar bilan yaqindan tanishishdi.
