O‘zbekiston Respublikasi Sog‘liqni saqlash vaziri Alisher Shodmonov hamda Germaniyaning nufuzli VAMs GmbH kompaniyasi rahbari Isroil Izoxov o‘rtasida hamkorlik to‘g‘risidagi kelishuv imzolandi. Bu haqda Sog‘liqni saqlash vazirligiga tayanib, O‘zA xabar bermoqda.
Jizzaxda viloyatning sarmoyaviy salohiyatini oshirish va to‘g‘ridan-to‘g‘ri xorijiy investitsiyalarni jalb etishga bag‘ishlangan xalqaro forumda AQSh, Buyuk Britaniya, Germaniya, Gretsiya, Ispaniya, Rossiya, Belarus, Latviya, Turkiya, Hindiston, Xitoy, Janubiy Koreya, Yaponiya, BAA, Isroil, Qozog‘iston, Singapur singari 28 mamlakatdan 300 ga yaqin ishtirokchi qatnashmoqda. Shuningdek, chet el diplomatik missiyalari, qator xalqaro moliya institutlari, yirik xorijiy kompaniyalar vakillari ham ishtirok etyapti.
Ushbu xalqaro investitsion forum doirasida O‘zbekiston Respublikasi Sog‘liqni saqlash vaziri Alisher Shodmonov hamda Germaniyaning nufuzli VAMs GmbH kompaniyasi rahbari Isroil Izoxov o‘rtasida hamkorlik to‘g‘risidagi kelishuv imzolandi. Unga ko‘ra, O‘zbekistonda aholiga nefrologik va gemodializ yordam sohasida yangi investitsiya loyiha amalga oshiriladi.
Jumladan, yuqoridagi hamkorlik doirasida mamlakat sog‘liqni saqlash tizimiga xususiy investitsiyalarni jalb qilish, nefrologiya sohasida dori-darmon va farmatsevtika mahsulotlari ishlab chiqarish uchun sanoat kompleksini yaratish ko‘zda tutilmoqda. Natijada, mamlakat tibbiyot muassasalarida mavjud gemodializ qurilmalari modernizatsiya qilinadi va ularning zamonaviy tibbiy jihozlar bilan to‘liq ta’minlash ishlari amalga oshiriladi. Davlat-xususiy sektor hamkorligi tamoyillari bo‘yicha gemodializ xizmatini ko‘rsatuvchi 20 ga yaqin yangi tibbiy klinikalar tashkil etiladi. Bundan tashqari, 2019-yilda Jizzax shahrida tumanlararo gemodializ markazini ochish ham rejalashtirilgan. Shuningdek, gemodializ uchun tibbiy materiallarni ishlab chiqaruvchi zavod quriladi.
Ushbu kelishuv bo‘yicha 2022-yilgacha rejalashtirilgan investitsiya hajmi 27 million AQSh dollarini tashkil etadi.
Izoh (0)