Navoiy kon-metallurgiya kombinatining Janubiy kon boshqarmasi, Zarmitan sanoat maydonidagi “Fujumsoy” koniga qarashli “6-G” tik lahm shaxtasi foydalanishga topshirildi. Bu haqda “Zarafshon” xabar bermoqda.
Bu kon O‘zbekistonda mustaqillik yillari qurilgan va foydalanishga topshirilgan shu xildagi birinchi inshoot hisoblanadi.
— Obyekt qurilishida O‘zbekistondan tashqari Xitoy, Rossiyada ishlab chiqarilgan zamonaviy jihozlar, asbob-uskunalardan foydalanildi, — deydi Navoiy kon-metallurgiya kombinati bosh direktori Q.Sanaqulov. — Chuqurligi 500 metr, aylanasi 6 metr bo‘lgan bu tik lahm shaxtasi 550 ming tonna hajmdagi toshni qayta ishlash imkonini beradi. Loyiha qiymati 22 million AQSH dollariga teng inshoot mamlakatning iqtisodiy rivojlanishida muhim ahamiyat kasb etadi.
Marosimda mehnatda alohida o‘rnak ko‘rsatgan bir guruh konchilar qimmatbaho sovg‘alar bilan taqdirlandi. Kon ishchilariga 2 ta “Tez tibbiy yordam” mashinasi topshirildi.
Izoh (0)