O‘zbekiston mustaqilligining 27 yilligi arafasida Nukus shahrida kam ta’minlangan, ijtimoiy himoyaga muhtoj, boquvchisini yo‘qotgan 42 oilaga uy-joylar kaliti bepul topshirildi, deya xabar bermoqda O‘zA.
Shu munosabat bilan tashkil etilgan tadbirda mahalliy hokimiyat va jamoat tashkilotlari vakillari, xonadon sohiblari va ularning yaqinlari ishtirok etdi.
– Uy-joy sifatida foydalanishga topshirilgan mazkur bino avval Nukus xalqaro aeroportining mehmonxonasi bo‘lgan, – deydi Nukus shahar hokimi Paraxat Toreshov. – Inshoot ko‘p yillardan buyon qarovsiz qolgan edi. Bu yerda keng ko‘lamli qayta qurish va ta’mirlash ishlari olib borildi. Yashash uchun barcha sharoit yaratildi. Kam ta’minlangan, nogiron yoki boquvchisini yo‘qotgan, uy-joyga ega bo‘lmagan fuqarolarga yordam tariqasida bepul berildi. Yangi uylarga ega bo‘lgan oilalarning ijtimoiy-iqtisodiy holati Nukus shahar hokimligi huzurida tuzilgan maxsus komissiya tomonidan o‘rganib chiqildi.
Qariyb bir oy davom etgan ta’mirlash ishlari natijasida bino tomiga yangi shifer yotqizilib, ichkarisida pardozlash ishlari olib borildi. Yangi eshik-romlar o‘rnatildi. Elektr energiyasi, suv, gaz tarmoqlari to‘liq qayta ulandi. Har bir xonadon alohida suv isitish tizimi bilan ta’minlandi. Hovlida o‘rindiqlar qo‘yilib, bolalar maydonchasi tashkil etildi.
– Ko‘p yillardan buyon ikki farzandim bilan ijarada yashardim, – deydi yangi uyga ko‘chib o‘tgan Elmira Absametova. – Bolalarimdan biri nogiron, shuning uchun ishga ham chiqa olmasdim. Buning oqibatida yetishmovchilik yuzaga kelardi. Uy olish haqida o‘ylab ham ko‘rmaganman. Davlatimizdan minnatdorman. Bizdek muhtojlarga bepul uy-joy qilib berdi. To‘risini aytsam, hech qanday to‘lovlarsiz yangi uyga ega bo‘lganimga hozir ham ishona olmayapman. Bunday ezgu ishlar boshida turgan barcha insonlarga chin yurakdan rahmatlar aytaman.
Izoh (0)