O‘zbekiston mustaqilligining 27 yilligi munosabati bilan Prezident Shavkat Mirziyoyev nomiga xorijiy davlatlar va nufuzli xalqaro tashkilotlar rahbarlaridan qutlovlar kelmoqda. Bu haqda Prezident matbuot xizmati xabar berdi.
Jumladan, AQSh prezidenti Donald Tramp o‘z tabrigida mamlakat mustaqilligining 27 yilligini erkin va jadal rivojlanayotgan davlat sifatida nishonlayotganidan xursandligini bildirgan.
“O‘tgan 27 yil mobaynida bizning munosabatlarimiz izchil rivojlandi va shu yil may oyida Sizning Oq uyga tarixiy tashrifingiz uning eng yuksak bosqichi bo‘ldi. Men Siz bilan uchrashganimdan, mintaqadagi umumiy tahdidlarni hal qilish uchun strategik sherikligimizga yangi sur’at baxsh etish imkoniyatidan mamnun bo‘ldim. Shuningdek, Sizni siyosat, iqtisodiyot va inson huquqlari sohalarida amalga oshirayotgan, O‘zbekiston xalqining ravnaqi va farovonligi hamda tinch taraqqiyot orqali gullab-yashnashi uchun mustahkam poydevor bo‘lib xizmat qiladigan keng ko‘lamli islohotlaringiz bilan qutlayman”, deyiladi tabrikda.
Xitoy raisi Si Szinpin yo‘llagan tabrikda Xitoy tomoni O‘zbekistonning jahon miqyosidagi obro‘-e’tibori yuksalayotganidan yaxshi qo‘shni, ishonchli hamkor va yaqin do‘st sifatida g‘oyat mamnunligi qayd etilgan.
“Men Xitoy — O‘zbekiston munosabatlarini rivojlantirishga katta e’tibor qaratib kelmoqdaman. Siz bilan o‘rtamizdagi samimiy ishchan munosabat va shaxsiy do‘stligimizni yuksak qadrlayman. Shanxay hamkorlik tashkilotining yaqinda Sindao shahrida bo‘lib o‘tgan sammiti doirasida biz samarali uchrashuv o‘tkazdik, qator muhim kelishuvlarga erishdik. Ularning barchasi Xitoy va O‘zbekiston munosabatlari rivojiga yangi harakatlantiruvchi kuch bag‘ishladi”, deyilgan tabrikda.
Qutlovlar kelishi davom etmoqda.
Izoh (0)