Toshkentda atoqli belorus adibi va jamoat arbobi Yakub Kolas xotirasini yod etish va uning byustiga gul qo‘yish marosimi o‘tkazildi, deb yozadi O‘zA.
Tadbirda taniqli davlat va jamoat arboblari, ilm-fan, madaniyat, san‘at namoyandalari, adabiyot sohasi vakillari, yoshlar, Belarus Respublikasining O‘zbekistondagi elchixonasi xodimlari, Toshkent shahridagi “Svitanak” belorus madaniyat markazi a‘zolari ishtirok etdi.
O‘zbekiston Yozuvchilar uyushmasi, Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasining tashabbusi bilan tashkil etilgan tadbirda Yakub Kolasning xotirasi yod etilib, yuksak hurmat ko‘rsatildi. Adib ijodiy faoliyati misolida o‘zbek va belorus adabiy aloqalarining kelgusi istiqboliga e‘tibor qaratildi.
Nazm, nasr, dramaturgiya, adabiyotshunoslik, badiiy publitsistika janrlarida birday barakali ijod qilgan Yakub Kolas ham belorus adabiyotining yorqin vakillaridan biri hisoblanadi.
Yakub Kolas hayotida O‘zbekiston alohida o‘rin tutadi. Ikkinchi jahon urushi davom etayotgan 1941—1943-yillarda u o‘zi faoliyat ko‘rsatayotgan Belarus Fanlar akademiyasi tarkibida Toshkentga ko‘chib kelib, ikki yildan ziyodroq vaqt oilasi bilan shu yerda yashagan. Bu davrda G‘afur G‘ulom, Hamid Olimjon, Maqsud Shayxzoda singari o‘zbek adabiyoti vakillari bilan mustahkam ijodiy hamkorlik o‘rnatadi.
Toshkentda yashagan vaqtida adib “O‘z yaqinlarimga”, “Rim – Berlin yoyida”, “Ona yer himoyachilariga”, “Kurashuvchi xalqqa”, “Yer ovozi” kabi o‘nlab she‘rlar, “Dushman bilan uchrashuv”, “Doya Tanya”, “Razvedkada” qissalarini yozadi.
Bugungi kunda ham O‘zbekistonda Yakub Kolas ijodiga qiziqish yuqori. Mamlakatdagi adabiy nashrlarda uning asarlari muntazam chop etib kelinmoqda. Yakub Kolasning byusti poytaxt markazidagi Shahrisabz va Shevchenko ko‘chalari chorrahasidagi so‘lim xiyobonda o‘rnatilgani ham uning ijodi, shaxsiyatiga bo‘lgan ulkan hurmat va ehtiromning yaqqol namunasidir.
Izoh (0)