Ўзбекистон мустақиллигининг 27 йиллиги муносабати билан Президент Шавкат Мирзиёев номига хорижий давлатлар ва нуфузли халқаро ташкилотлар раҳбарларидан қутловлар келмоқда. Бу ҳақда Президент матбуот хизмати хабар берди.
Жумладан, АҚШ президенти Дональд Трамп ўз табригида мамлакат мустақиллигининг 27 йиллигини эркин ва жадал ривожланаётган давлат сифатида нишонлаётганидан хурсандлигини билдирган.
«Ўтган 27 йил мобайнида бизнинг муносабатларимиз изчил ривожланди ва шу йил май ойида Сизнинг Оқ уйга тарихий ташрифингиз унинг энг юксак босқичи бўлди. Мен Сиз билан учрашганимдан, минтақадаги умумий таҳдидларни ҳал қилиш учун стратегик шериклигимизга янги суръат бахш этиш имкониятидан мамнун бўлдим. Шунингдек, Сизни сиёсат, иқтисодиёт ва инсон ҳуқуқлари соҳаларида амалга ошираётган, Ўзбекистон халқининг равнақи ва фаровонлиги ҳамда тинч тараққиёт орқали гуллаб-яшнаши учун мустаҳкам пойдевор бўлиб хизмат қиладиган кенг кўламли ислоҳотларингиз билан қутлайман», дейилади табрикда.
Хитой раиси Си Цзиньпин йўллаган табрикда Хитой томони Ўзбекистоннинг жаҳон миқёсидаги обрў-эътибори юксалаётганидан яхши қўшни, ишончли ҳамкор ва яқин дўст сифатида ғоят мамнунлиги қайд этилган.
«Мен Хитой — Ўзбекистон муносабатларини ривожлантиришга катта эътибор қаратиб келмоқдаман. Сиз билан ўртамиздаги самимий ишчан муносабат ва шахсий дўстлигимизни юксак қадрлайман. Шанхай ҳамкорлик ташкилотининг яқинда Синдао шаҳрида бўлиб ўтган саммити доирасида биз самарали учрашув ўтказдик, қатор муҳим келишувларга эришдик. Уларнинг барчаси Хитой ва Ўзбекистон муносабатлари ривожига янги ҳаракатлантирувчи куч бағишлади», дейилган табрикда.
Қутловлар келиши давом этмоқда.
Изоҳ (0)