“Taraqqiyot strategiyasi” markazi, Oʻzbekiston Prezidenti Devoni, Sogʻliqni saqlash vazirligi vakillaridan iborat Oʻzbekiston delegatsiyasi Isroil davlatida boʻlib turibdi. “Taraqqiyot strategiyasi” markazidan maʼlum qilishlaricha, tashrifdan koʻzlangan asosiy maqsad — sogʻliqni saqlash tizimidagi eng soʻnggi oʻzgarishlar, boshqaruvning samarali usullari, zamonaviy tibbiyot uskunalari va texnologiyalari bilan tanishish, xorijiy muassasa va mutaxassislar bilan yaqin aloqalarni oʻrnatishdir.
Delegatsiya aʼzolari Tel-Aviv, Quddus va Xolon shaharlariga tashrif buyurib, sogʻliqni saqlash tizimi vakillari bilan qator uchrashuv va muzokaralar oʻtkazdi hamda yetakchi tibbiyot muassasalari faoliyati bilan tanishdi. Isroil Sogʻliqni saqlash vazirligi, tez tibbiy yordam, milliy tibbiy sugʻurta tizimi, davlat tibbiyot markazi, xususiy shifoxonalar, bolalar va ayollar uchun ixtisoslashgan boʻlimlar faoliyati oʻrganildi.
Bundan tashqari, yurak-qon tomir va onkologik kasalliklarga ixtisoslashgan hamda halqaro standartlar asosida yuqori sifatli xizmatlar koʻrsatuvchi tibbiyot muassasalariga tashrif buyurildi. U yerda shifokor va yetakchi mutaxassislar bilan fikr almashib, koʻplab foydali maʼlumotlar va tajribalar oʻrganilgan.
“Zamonaviy innovatsion texnologiyalar, eng soʻnggi rusumdagi tibbiyot uskunalari imkoniyatlari, telemeditsina, elektron tibbiyot kartasi, maʼlumotlar bazasi kabi Isroil Sogʻliqni saqlash tizimining asosi hisoblanuvchi vosita va tizimlar ham eʼtibordan chetda qolmadi. Shifoxonalarda yoʻlga qoʻyilgan logistika va operativ harakatlanish usullari ham oʻrganildi”, — deyiladi markaz axborotida.
Oʻzbekiston delegatsiyasi vakillari Xolon shahriga tashrif davomida “Volfson” shifoxonasi qoshida tashkil etilgan “Save Childs Heart” loyihasi ishtirokchilari bilan uchrashdi.
Isroilda oʻtkazilgan dastlabki muzokaralar natijalariga koʻra, Oʻzbekiston Sogʻliqni saqlash vazirligi Sheba davlat tibbiyot markazi, Schneider bolalar tibbiyot markazi, Magen David Adon tez tibbiy yordam xizmati hamda LR group kompaniyasi bilan hamkorlik memorandumlari, shuningdek, ikki davlat vazirliklari oʻrtasida telemeditsina yoʻnalishida kelishuv imzolandi.
Hamkorliklar doirasida Isroil klinikalari tomonidan oʻzbekistonlik shifokorlarga bepul maslahatlar beriladi hamda mutaxassislar oʻrtasida oʻzaro tajriba almashish yoʻlga qoʻyiladi. Shuningdek, telemeditsina yoʻnalishida oʻzbekistonlik eng yaxshi bolalar shifokorlari, shu jumladan, onkolog va transplantologlar Isroilda malaka oshiradi va yetakchi shifokorlar bilan doimiy onlayn muloqotda boʻladi.
Izoh (0)