«Тараққиёт стратегияси» маркази, Ўзбекистон Президенти Девони, Соғлиқни сақлаш вазирлиги вакилларидан иборат Ўзбекистон делегацияси Исроил давлатида бўлиб турибди. «Тараққиёт стратегияси» марказидан маълум қилишларича, ташрифдан кўзланган асосий мақсад — соғлиқни сақлаш тизимидаги энг сўнгги ўзгаришлар, бошқарувнинг самарали усуллари, замонавий тиббиёт ускуналари ва технологиялари билан танишиш, хорижий муассаса ва мутахассислар билан яқин алоқаларни ўрнатишдир.
Делегация аъзолари Тел-Авив, Қуддус ва Холон шаҳарларига ташриф буюриб, соғлиқни сақлаш тизими вакиллари билан қатор учрашув ва музокаралар ўтказди ҳамда етакчи тиббиёт муассасалари фаолияти билан танишди. Исроил Соғлиқни сақлаш вазирлиги, тез тиббий ёрдам, миллий тиббий суғурта тизими, давлат тиббиёт маркази, хусусий шифохоналар, болалар ва аёллар учун ихтисослашган бўлимлар фаолияти ўрганилди.
Бундан ташқари, юрак-қон томир ва онкологик касалликларга ихтисослашган ҳамда ҳалқаро стандартлар асосида юқори сифатли хизматлар кўрсатувчи тиббиёт муассасаларига ташриф буюрилди. У ерда шифокор ва етакчи мутахассислар билан фикр алмашиб, кўплаб фойдали маълумотлар ва тажрибалар ўрганилган.
«Замонавий инновацион технологиялар, энг сўнгги русумдаги тиббиёт ускуналари имкониятлари, телемедицина, электрон тиббиёт картаси, маълумотлар базаси каби Исроил Соғлиқни сақлаш тизимининг асоси ҳисобланувчи восита ва тизимлар ҳам эътибордан четда қолмади. Шифохоналарда йўлга қўйилган логистика ва оператив ҳаракатланиш усуллари ҳам ўрганилди», — дейилади марказ ахборотида.
Ўзбекистон делегацияси вакиллари Холон шаҳрига ташриф давомида «Вольфсон» шифохонаси қошида ташкил этилган «Save Childs Heart» лойиҳаси иштирокчилари билан учрашди.
Исроилда ўтказилган дастлабки музокаралар натижаларига кўра, Ўзбекистон Соғлиқни сақлаш вазирлиги Sheba давлат тиббиёт маркази, Schneider болалар тиббиёт маркази, Magen David Adon тез тиббий ёрдам хизмати ҳамда ЛР гроуп компанияси билан ҳамкорлик меморандумлари, шунингдек, икки давлат вазирликлари ўртасида телемедицина йўналишида келишув имзоланди.
Ҳамкорликлар доирасида Исроил клиникалари томонидан ўзбекистонлик шифокорларга бепул маслаҳатлар берилади ҳамда мутахассислар ўртасида ўзаро тажриба алмашиш йўлга қўйилади. Шунингдек, телемедицина йўналишида ўзбекистонлик энг яхши болалар шифокорлари, шу жумладан, онколог ва трансплантологлар Исроилда малака оширади ва етакчи шифокорлар билан доимий онлайн мулоқотда бўлади.
Изоҳ (0)