Tojikiston Favqulodda vaziyatlar qo‘mitasi rahbari Rustam Nazarzoda aytishiga qaraganda, Saryoz ko‘lida o‘tkazilgan tekshiruvlar ko‘l qirg‘oqlarida o‘pirilish xavfi yo‘qligini ko‘rsatgan, deb yozadi Sputnik.
“Tahlillar shuni ko‘rsatadiki, Saryoz ko‘li qirg‘oqlarining o‘pirilish xavfi yo‘q. Ko‘lda seysmik holat doimiy nazorat ostida”, — dedi Rustam Nazarzoda.
Nazarzoda aytishiga qaraganda, ko‘l qirg‘oqlari va uning tubida oldindan ogohlantirish tizimi o‘rnatilgan. Ko‘l va qirg‘oqlarning umumiy holati, to‘planayotgan va oqib chiqayotgan suv hajmi tun-u kun kuzatuv ostida.
Misol tariqasida Nazarzoda 2015-yilda bo‘lib o‘tgan 6,5 balli zilzilani esga oldi. O‘shanda tabiiy ofat to‘g‘onni buza olmagan.
Eslatib o‘tamiz, Saryoz ko‘li 1911-yilda 9 balli yer qimirlashi oqibatida paydo bo‘lgan edi. O‘shanda qulab tushgan tog‘ bo‘lagi Murg‘ab daryosi o‘zanini to‘sib, balandligi 567 metr bo‘lgan tabiiy to‘g‘on hosil qilgan edi.
Osmondan nazar solganda Saryoz ko‘lining shakli ajdarhoga o‘xshash maxluqni eslatadi, shuning uchun ham ba’zan uni uxlayotgan ajdarho deyishadi.
Uzunligi 70 kilometr, chuqurligi 500 metr va dengiz sathidan 3255 metr balandlikda joylashgan bo‘lgan ushbu ko‘l – Pomir tog‘ining seysmologik jihatdan eng xavfli bo‘lgan hududida joylashgan.
Ekspertlar aytishiga qaraganda, ushbu joyda har 250 yilda 8—9 balli yer va har 100 yilda 7 balli yer qimirlashi bo‘lib turar ekan. Navbatdagi yer qimirlashi oqibatida ko‘ldagi suv oqib chiqa boshlasa O‘zbekiston, Qirg‘iziston, Qozog‘iston, Afg‘oniston va Turkmaniston zarar ko‘rishi mumkin.
Izoh (0)