Rossiyaning Mineralniye vodi shahri aeroportida bojxona xodimlari 40 juft maxsini olib oʻtayotgan Oʻzbekiston fuqarosini toʻxtatdi.
Yashil yoʻlakdan oʻtayotgan fuqaro qoʻl yuklari orasida 40 juft deklaratsiyada koʻrsatilmagan mahsulot — oʻzbek milliy uslubida tikilgan maxsilar borligi aniqlandi. Noqonuniy yukning vazni 16 kilogrammni tashkil etdi.
Shimoliy Kavkaz respublikalaridan birining poytaxtida oshpaz boʻlib ishlaydigan yigit maxsilarni oʻzi mehnat qiladigan qahvaxona egasi buyurtmasiga koʻra olib kelganini bildirgan.
Ayni paytda Oʻzbekiston fuqarosiga nisbatan maʻmuriy qonunbuzarlik ishi qoʻzgʻatilgan va u jarimaga tortilishi kutilmoqda. 40 juft maxsi esa aeroport bojxonasining saqlash kamerasida saqlanmoqda.
Maʻlumot uchun, Rossiya hududiga shaxsiy ehtiyojdan ortiqcha boʻlgan miqdorda (tijorat maqsadida) tovarlar, shuningdek, sertifikatga ega boʻlmagan oziq-ovqat mahsulotlari va nosvoy olib kelish taʻqiqlanadi.
Izoh (0)