Krasnoyarsk o‘lkasida Mi-8 vertolyoti qulashi natijasida 18 kishi halok bo‘ldi

Rossiyaning Krasnoyarsk o‘lkasida Vankor koni yaqinida Mi-8 vertolyoti halokatga uchradi, deb yozadi “RIA Novosti”.

FVV ma’lumotlariga ko‘ra, avariya Igarka aholi punktidan 2 km masofada Toshkent vaqti bilan 8:20 da yuz bergan.

Vertolyot bortida uch nafar ekipaj a’zosi va 15 nafar soqchilar bo‘lgan. Xavfsizlik qoidalari buzilishi haqidagi modda bo‘yicha jinoyat ishi qo‘zg‘atildi.

Vertolyot kimsasiz joyga qulagan. Voqea joyidan ikkala “qora quti” — parvoz parametrlarini qayd etish uskunasi va bort o‘ziyozari ham topilgan. Ularning holati aniqlashtirilmoqda.

Mi-8 parvoz chog‘ida halokatga uchragan, qulashigacha u ikki km yo‘l bosgan. Havo kemasi vayron bo‘lib, yonib ketgan. Yer bilan to‘qnashgan vaqtida vertolyotning ikkala yoqilg‘i baki ham portlab ketgan.

Dastlabki ma’lumotlarga ko‘ra, halokatga texnik nosozlik yoki uchuvchining xatosi sabab bo‘lgan bo‘lishi mumkin.

Vertolyot UTair kompaniyasiga tegishli bo‘lgan.