Britaniyada IShIDga aloqador eng yosh jihodchi qiz umrbod qamoqqa hukm qilindi

Buyuk Britaniyada sud IShID terrorchilik tashkilotiga aloqador eng yosh jihodchi qizga nisbatan hukm chiqardi, deb yozadi Sky News.

18 yoshli Safa Bular 13 yillik jazoni majburiy o‘tash muddati bilan umrbod qamoq jazosiga mahkum etildi (u afv haqida ushbu muddat o‘tganidan keyingina arznoma berishi mumkin).

Qizni IShID jangarisi Navid Husayn guruhga jalb qilgan vaqtida u maktab imtihonlariga tayyorlanayotgan bo‘lgan. Qiz o‘zidan 15 yosh katta Husayn bilan turmush qurish uchun Suriyaga ketishga uringan, ammo politsiya bunga yo‘l qo‘ymagan. Erkak keyinchalik uchuvchisiz uchar qurilmalar hujumida o‘ldirilgan.

Tergov hujjatlariga ko‘ra, jihodchi qiz Britaniya muzeyida o‘z opasi va onasi bilan terakt uyushtirishni rejalashtirgan. U rejani ishlab chiqishda bosh rolni o‘ynagan. Opasi va onasi Vestminster saroyida pichoq bilan hujumlarni rejalashtirgan. Ikkalasi ham o‘z aybiga iqror bo‘lgan. Qizni 16 yillik jazoni majburiy o‘tash muddati bilan umrbod qamoqqa, onasini esa 6 yil-u 9 oy qamoqqa hukm qilishdi.

Bular IShIDning Buyuk Britaniyadagi yagona ayollar yacheykasining eng yosh va eng so‘nggi mahkumasi bo‘ldi. Qiz advokatining so‘zlariga ko‘ra, u 15 yoshida terrorchilar ta’siriga tushib qolgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.