Qozog‘istonda sirtqi ta’lim bekor qilinadi

2019-yilning 1-yanvaridan Qozog‘istonda sirtqi ta’lim berish to‘xtatiladi. Bu haqda mamlakat ta’lim vaziri Yerlan Sagadiyev “Ochiq muloqot” portalida fuqarolar bilan qilgan muloqoti chog‘ida ma’lum qildi, deya xabar beradi “Xalq so‘zi”.

Vazir yangi yildan sirtqi ta’lim berish to‘xtatilishi, shu bilan birga, bu shaklda ta’lim olishni davom ettirayotgan talabalar uchun o‘z o‘qishlarini tugatib olish imkoniyati berilishini ta’kidlab o‘tgan.

Bundan tashqari, oliy ta’lim dasturlarini o‘zlashtirish uchun muddatlar bekor qilinishi rejalashtirilyapti. Ya’ni bakalavriatni tezlashtirilgan rejimda tugallash imkonini beradigan dasturlarni oliy o‘quv yurtlarining o‘zlari aniqlaydi va ishlab chiqadi.

OTMlarda pulli asosda ta’lim olish uchun belgilangan narxlarga oid me’yor bekor qilinadi. Pulli bo‘limlarga o‘qishga kirgan abituriyentlar uchun narxlarni Qozog‘iston universitetlarining o‘zlari mustaqil belgilaydi.

Ma’lumot uchun, joriy yil iyul oyida Nursulton Nazarboyev respublikadagi ta’lim tizimini tanqid qilib, mahalliy universitetlarda kadrlar tayyorlash sifati pastligi uchun yoshlar Rossiya oliy ta’lim muassasalarini afzal ko‘rayotganini qayd etib o‘tgandi.