Farg‘onada 3 yoshli o‘g‘lini bo‘g‘ib o‘ldirib, jasadini archa tagiga yashirib qo‘ygan onaga nisbatan sud hukmi o‘qildi. Bu haqda “Daryo” muxbiri Azizjon Ermatov xabar bermoqda.
Foto: “Darakchi.uz”Jinoyat ishlari bo‘yicha Farg‘ona viloyati sudidan olingan ma’lumotga ko‘ra, sudlanuvchi S.T. turmushidan ajrashib, ota uyida yashay boshlagan. Joriy yilning 23-mart kuni esa oilaviy nizo tufayli 3 yoshli o‘g‘li bilan ota uyini tark etib, 23—25-mart kunlari davomida Qo‘qon shahrida bir nechta shaxslarning uylarida tunab qolgan. 26-mart kuni o‘g‘li F.I.ni olib, vaqtincha ishlash maqsadida Toshkent shahriga borgan. Lekin farzandi bilan o‘ziga mos ish topa olmagan.
2-aprel kuni Toshkent shahridan farzandi bilan Dang‘ara tumanida joylashgan avtobuslar shohbekatiga kelib, u yerdan 14-yo‘nalishli avtobusga o‘tirib, Qo‘qon shahri tomonga harakatlanib keladi. “Avtokemping” mas’uliyati cheklangan jamiyati binosining ro‘parasida avtobusdan tushib qoladi. Avtokemping oldidagi archalarning orqa tomoniga o‘tib, o‘ng qo‘l barmoqlari bilan voyaga yetmagan o‘g‘lining bo‘yin qismini qattiq bo‘g‘ishi oqibatida o‘g‘li F.I. vafot etgan. O‘g‘lining murdasini archa daraxti tagiga tashlab, ishlash maqsadida yana Toshkent shahriga qaytadi. Tezkor tadbirlar davomida 3-aprel kuni S.T. Toshkent shahrida qo‘lga olingan.
Jinoyat ishlari bo‘yicha Farg‘ona viloyati sudi S.T.ga nisbatan jazo turi va me’yorini belgilashda, sodir etgan jinoyatining xususiyati, ijtimoiy xavflilik darajasi, jabrlanuvchi qonuniy vakilining S.T.ga nisbatan og‘irroq jazo tayinlash haqidagi talabi, jinoyatni g‘arazli va boshqacha past niyatlarda sodir etgani inobatga olinib, 15 yil ozodlikdan mahrum qilish jazosini tayinladi.
Izoh (0)