Qo‘qon shahrida o‘lik holda topilgan o‘g‘il bolaning shaxsi aniqlandi. Dastlabki taxminlarga ko‘ra, u o‘z onasi tomonidan o‘ldirilgan bo‘lishi mumkin. Bu haqda “Daryo” muxbiri Azizjon Ermatov xabar bermoqda.
Farg‘ona viloyati prokuraturasidan olingan ma’lumotga ko‘ra, Qo‘qon shahridagi Qo‘qon–Toshkent avtobekati yaqinidagi avtokemping ustaxonasidan o‘lik holda topilgan o‘g‘il bolaning shaxsi aniqlandi. U 2015-yil 4-noyabrda tug‘ilgan Firdavsbek Ibrohimjonov Iqboljon o‘g‘li bo‘lgan.
Dastlabki taxminlarga ko‘ra, u o‘z onasi — 1995-yil 3-sentabrda tug‘ilgan, Andijon viloyati Qo‘rg‘ontepa tumani Ma’murobod qishlog‘ida istiqomat qilib kelgan ayol tomonidan o‘ldirilgan bo‘lishi mumkin. Olib borilgan tezkor tergov-qidiruv ishlari natijasida gumonlanuvchi Toshkent shahrida qo‘lga olingan.
Qayd etishlaricha, ayol turmushidan ajrashib, ota uyida yashay boshlagan. 23-mart kuni esa oilaviy nizo tufayli 3 yoshli o‘g‘li bilan ota uyini tark etib, vaqtincha ishlash maqsadida Toshkent shahriga borgan. Lekin farzandi bilan o‘ziga mos ish topa olmagan.
2-aprel kuni u farzandi Firdavsni vaqtincha qarab turishi uchun tanishiga qoldirish maqsadida Toshkentdan Farg‘ona viloyatining Uchko‘prik tumaniga keladi. Tanishini topa olmagach, yo‘nalishli avtobusda Qo‘qon shahriga kelgan.
“Ayol Qo‘qon–Toshkent avtobekati hududida o‘g‘lini bo‘g‘ib o‘ldirib, so‘ng ishlash maqsadida yana Toshkent shahriga qaytgan bo‘lishi mumkin”, — deya xabar beradi “Daryo” muxbiri.
Xabar berishlaricha, hozirda voqea yuzasidan tergov harakatlari olib borilmoqda.