Фарғонада 3 ёшли ўғлини бўғиб ўлдириб, жасадини арча тагига яшириб қўйган онага нисбатан суд ҳукми ўқилди. Бу ҳақда «Дарё» мухбири Азизжон Эрматов хабар бермоқда.
Фото: «Darakchi.uz»Жиноят ишлари бўйича Фарғона вилояти судидан олинган маълумотга кўра, судланувчи С.Т. турмушидан ажрашиб, ота уйида яшай бошлаган. Жорий йилнинг 23 март куни эса оилавий низо туфайли 3 ёшли ўғли билан ота уйини тарк этиб, 23—25 март кунлари давомида Қўқон шаҳрида бир нечта шахсларнинг уйларида тунаб қолган. 26 март куни ўғли Ф.И.ни олиб, вақтинча ишлаш мақсадида Тошкент шаҳрига борган. Лекин фарзанди билан ўзига мос иш топа олмаган.
2 апрель куни Тошкент шаҳридан фарзанди билан Данғара туманида жойлашган автобуслар шоҳбекатига келиб, у ердан 14-йўналишли автобусга ўтириб, Қўқон шаҳри томонга ҳаракатланиб келади. «Автокемпинг» масъулияти чекланган жамияти биносининг рўпарасида автобусдан тушиб қолади. Автокемпинг олдидаги арчаларнинг орқа томонига ўтиб, ўнг қўл бармоқлари билан вояга етмаган ўғлининг бўйин қисмини қаттиқ бўғиши оқибатида ўғли Ф.И. вафот этган. Ўғлининг мурдасини арча дарахти тагига ташлаб, ишлаш мақсадида яна Тошкент шаҳрига қайтади. Тезкор тадбирлар давомида 3 апрель куни С.Т. Тошкент шаҳрида қўлга олинган.
Жиноят ишлари бўйича Фарғона вилояти суди С.Т.га нисбатан жазо тури ва меъёрини белгилашда, содир этган жиноятининг хусусияти, ижтимоий хавфлилик даражаси, жабрланувчи қонуний вакилининг С.Т.га нисбатан оғирроқ жазо тайинлаш ҳақидаги талаби, жиноятни ғаразли ва бошқача паст ниятларда содир этгани инобатга олиниб, 15 йил озодликдан маҳрум қилиш жазосини тайинлади.
Изоҳ (0)