Qishloq xo‘jaligi vazirligida Saudiya Arabistonining Aman Group Marketing kompaniyasi rahbari Omon Abubakr Turkistoniy bilan uchrashuv bo‘lib o‘tdi. Unda qishloq xo‘jaligi sohasida o‘zaro samarali hamkorlik masalalari muhokama qilindi. Bu haqda “Daryo”ga Qishloq xo‘jalik vazirligi matbuot xizmati ma’lum qildi.
—Bizning kompaniya meva-sabzovot mahsulotlari va qayta ishlangan mahsulotlarni Saudiya Arabistoni va Fors ko‘rfazining boshqa mamlakatlariga import qilishda katta tajribaga ega. Hozirga qadar Saudiya Arabistonining qishloq xo‘jalik mahsulotlariga bo‘lgan ehtiyojlarini Turkiya, Misr, Singapur, Sudan, Efiopiya, Keniya kabi davlatlar bilan aloqalar evaziga qondirib turibmiz. So‘nggi paytlarda yurtingizda xorijiy investorlarga yaratilayotgan sharoitlar, erkin savdo-sotiq uchun keng imkoniyatlar yaratilayotgani haqida xabarimiz bor. Aynan shu sabab O‘zbekiston bilan ishlashni maqsad qilganmiz.
Aman Group Marketing O‘zbekistonga bir emas, bir necha yirik Saudiya kompaniyalarining vakili sifatida tashrif buyurgan. Yaqin kunlarda biz yurtingizda o‘z vakolatxonamizni ochamiz. Bu vakolatxona O‘zbekiston bozorini o‘rganib, Saudiya Arabistoni kompaniyalari uchun hisobotlar taqdim etib boradi. Pirovard natijada o‘zaro hamkorlikni yangi bosqichga olib chiqadi. Ishonamizki, O‘zbekiston Saudiya Arabistonining qishloq xo‘jalik mahsulotlariga bo‘lgan ehtiyojlarini to‘la qoplay oladi. Shuningdek, qishloq xo‘jaligining alohida yo‘nalishi — sedana yetishtirish bo‘yicha ham hamkorlik istiqbollarini aynan O‘zbekistonda ko‘rmoqdamiz, — dedi Omon Abubakr Turkistoniy
Qishloq xo‘jaligi vazirligi vakili Abdumalik Namozov mehmonlarni O‘zbekistondagi investitsion muhit, yaratilgan sharoitlar, hamkorlikni boshqa yo‘nalishlari haqidagi ma’lumotlar bilan batafsil tanishtirdi.
—Ayni paytda Rossiya, Qozog‘iston, Janubiy Koreya va Xitoyga qishloq xo‘jalik mahsulotlari katta miqdorda eksport qilinmoqda. O‘zbekiston quritilgan va xo‘l o‘rik eksporti bo‘yicha dunyoda 2-, 3-o‘rinlarda turadi. Xurmo eksportida 3, mayiz borasida 4, gilos va olxo‘ri eksporti bo‘yicha dunyoda 5-o‘rinda turadi. Qishloq xo‘jaligiga investitsiya kirituvchilar uchun qator qulayliklar mavjud bo‘lib, ular investitsiya hajmiga ko‘ra 3 yildan 10 yilgacha barcha soliqlardan, shuningdek eksport bojlaridan ozod etiladi, — ta’kidladi Abdumalik Namozov.
Uchrashuv davomida meva-sabzovot mahsulotlarini saqlash va eksport qilishga ixtisoslashgan logistika markazini qurish, qo‘ychilikka ixtisoslashga yirik chorva kompleksini bunyod etish masalalari ham muhokama qilindi.
Izoh (0)