AQShdagi Sakramento shahri va Berriyessa ko‘li o‘rtasidagi o‘rmonda yong‘in yuz berdi. 30-iyun, shanba kuni mahalliy vaqt bilan tungi soat 02:00 larda yong‘in to‘g‘risida xabar qilingan. Bu haqda USA Today’ga tayanib, Forum Daily yozmoqda.
Mahalliy aholi vakillari avval hech qachon bunday kuchli yong‘inning guvohi bo‘lmagani, “hammasi kinodagiday” bo‘lganini aytgan.
Tabiiy ofat guvohlari yonib turgan o‘rmon ustidagi olovrang osmon aks etgan surat va videolarni ijtimoiy tarmoqqa yuklamoqda.
Osmon sarg‘ish tusga kirgan. Mavsumiy tumanlar ham boshlanib, shahar ustida zaharli smog (ishlab chiqarish chiqindilari tufayli havoning haddan tashqari ifloslanishi) vujudga kelgan. Atrof-muhit muhofazasi agentligi (EPA) 30-iyun, shanba kuni havo tozaligining jiddiy zarar ko‘rganini ma’lum qilgan. Natijada shahar favqulodda vaziyatlar departamenti hududning tutun bilan qoplangani to‘g‘risida aholini ogohlantirgan.
2-iyul, dushanba kuni havo tarkibi deyarli me’yorga kelgan. Shunga qaramasdan, EPA ob-havo sharoitining yomonlashishini bashorat qilmoqda. Bu degani, o‘tkir respirator (nafas olish sistemasi bilan bog‘liq kasalliklar) kasalliklari bor kishilar ochiq havoga chiqishdan saqlanib turishi lozim deyiladi.
AQSh meteorologiya xizmati ma’lumotlariga qaraganda, Yolo okrugidagi yong‘indan keyin ko‘tarilgan tutun Napa, Sonoma, San-Mateo va San-Fransisko okruglarida havoning ifloslanishiga sabab bo‘lgan.
The sky over San Francisco today from the Yolo County Fire.#countyfire pic.twitter.com/auVcITZomW
— William Chamberlain (@chamberlainwill) July 1, 2018
Ayni paytda qurbonlar va jarohat olganlar haqida hech qanday ma’lumot taqdim qilinmagan. Aholining qancha qismi evakuatsiya qilingani ham noma’lum. Yong‘inni bartaraf qilishda 110 ta yong‘in o‘chirish mashinasi, 29 ta jamoa, 12 ta vertolyot va 18 ta bulldozer qatnashgan.
Izoh (0)