Oq uy: Rossiya Qrimdan voz kechsagina, sanksiyalar bekor qilinadi

Rossiyaga Qrim uchun kiritilgan sanksiyalar yarim orol Ukrainaga qaytarib berilmagunicha kuchda qoladi. Bu haqda Oq uy matbuot kotibi Sara Sanders ma’lum qildi, deb yozadi “Interfaks”.

“Biz Rossiyaning Qrimni bosib olishga urinishini tan olmaymiz. Biz Rossiyaning fikriga qo‘shilmaymiz. Qrim uchun Rossiyaga kiritilgan sanksiyalarimiz Rossiya yarim orolni Ukrainaga qaytarmagunicha kuchda qoladi”, — dedi u jurnalistlarga.

Shu bilan birga, Sanders AQSh va Rossiya prezidentlari Donald Tramp va Vladimir Putinning bo‘lg‘usi sammitida AQSh tomonidan Qrimning Rossiyaga tegishli ekanligi tan olinishi ehtimoli muhokama qilinish-qilinmasligi haqidagi savolga javob bermadi.

“Men muzokaralar haqida hozir hech narsa aytmoqchi emasman”, — dedi Oq uy matbuot kotibi.