Rossiya hukumati Trampning Qrimni tan olishi ehtimoliga munosabat bildirdi

Qrimning Rossiyaga tegishli ekanligi aniq va bu masala Rossiya prezidenti Vladimir Putinning amerikalik hamkasbi Donald Tramp bilan uchrashuvida kun tartibiga kiritilmagan. Bu haqda Kreml rasmiy vakili Dmitriy Peskov ma’lum qildi, deb yozadi “RIA Novosti”.

Rossiya prezidentining matbuot kotibi ta’kidlashicha, Moskva va Vashingtonning ko‘p masalalar borasida fikrlari turlicha bo‘lsa-da, ikki tomonlama muloqotni yo‘lga qo‘yish zarurligi tushunchasi mustahkamlanmoqda.

“Ko‘rib turganingizdek, hozir siyosiy iroda baribir ustun keldi va bunday bahsli masalalar ikki tomonlama aloqani yo‘lga qo‘yish va kengaytirish yo‘lida to‘siq bo‘lmasligi kerakligi haqidagi tushuncha mustahkamlanmoqda”, — dedi u.

Avvalroq Donald Tramp Qrimni Rossiyaga tegishli hudud deb tan olish ehtimolini istisno qilmayotganligi xabar berilgan edi.