Qoraqalpog‘iston Respublikasidagi 3473 fermer xo‘jaligining 87791 gektar yerida parvarishlanayotgan g‘o‘za navlari baravj o‘smoqda. Bu haqda O‘zA xabar berdi.
Dalada ish qizg‘in, ayni paytda yaganalash va begona o‘tlardan tozalash ishlari yakuniga yetkazildi.
— Eng muhimi, bu ishlarga budjet tashkiloti yoki boshqa muassasalardan xodimlar jalb qilinmadi, — deydi Qoraqalpog‘iston Respublikasi Bandlik va mehnat munosabatlari vazirligi xodimi Maqset Izmuratov. — Iyun oyida hududda 24118 ishsiz fuqaro jamoat ishlariga jalb qilinib, bunga 9 milliard 582 million so‘m ajratildi. Shundan 19796 fuqaro qishloq xo‘jaligi ishlariga jalb qilindi. Ularga 6 milliard 312 million so‘m mablag‘ sarflandi.
Qoraqalpog‘istonda joriy yilda ilk bor paxtani klaster usulida yetishtirish yo‘lga qo‘yilmoqda.
Ellikqal’a tumanida “Bo`ston cluster” mas’uliyati cheklangan jamiyati tashkil etilib, u yerda 381 fermer xo‘jaligi tomonidan 11040 gektar maydonda paxta yetishtirish rejalashtirilgan. Jamiyat va fermer xo‘jaliklari o‘rtasida shartnomalar tuzildi.
Mazkur shartnomalarga asosan fermer xo‘jaliklari tomonidan jami 24264 tonna paxta yetkazib beriladi. Yetishtiriladigan xom ashyodan 9000 tonna tola olinib, 8000 tonna ip-kalava tayyorlanishi va ushbu mahsulotdan 5 million pogonometr jinsi matosi ishlab chiqarilishi rejalashtirilgan. Shu bilan birga, jamiyat tomonidan 150 ish o‘rni yaratilgan bo‘lib, yil yakuniga qadar bu ko‘rsatkichni 600 ga yetkazish rejalashtirilgan.
Izoh (0)