“Daryo”ning Farg‘onadagi muxbiri mahallalarda va oilalarda ijtimoiy-ma’naviy muhitni o‘rganish bo‘yicha Respublika ishchi guruhi a’zosi Laziz Rahmatov tomonidan berilgan ma’lumotlar asosida Qo‘shtepa tumanidagi 21-maktabgacha ta’lim muassasasining nochor ahvoli bilan tanishdi.
1970-yilda xo‘jalik shiyponi bog‘cha uchun moslashtirilgan va yillar davomida kapital ta’mirlanmagan. Bolalarga joy yetishmaydi, mavjud xonalar juda tor. Shu sababdan 90 o‘ringa mo‘ljallangan bog‘chada 75 nafar bola tarbiyalanmoqda.
Bog‘cha binosining balandligi belgilangan me’yordan past, tom qismi ta’mirtalab. Kanalizatsiya mavjud emas, isitish tizimi nosoz. Mavjud 2 ta yozgi ayvonchaning bittasi ishlamaydi, pol qismi singan, tom qismi teshilgan. Yomg‘ir yog‘di deguncha undan chakka o‘tadi. O‘yin maydonchalari umuman yo‘q. Hojatxona sanitariya talablariga mos emas.
Mavjud oziq-ovqat mahsulotlarini saqlash uchun muzlatgich yetishmaydi. Oshxona va guruhlarga ichimlik suvi kiritilmagan. Mavjud 3 guruhning har birida bolalar bitta xonada mashg‘ulot o‘tadi, ovqatlanadi va uxlaydi.
1 xonadan iborat oshxona ham tor bo‘lib, unda idish-tovoqlarni yuvish va saqlash joylari yo‘q, kafellari yaroqsiz holga kelib qolgan.
Bog‘chada qo‘shimcha yana 2 ta guruh tashkil etish belgilangan. Ammo xona, zarur mebel va jihozlar yetishmasligi tufayli amalda qo‘shimcha guruh ochishning imkoni yo‘q.
Bog‘cha mudirasi Shohista Kamolovaning aytishicha, 2017-yil yakunida muassasani kapital ta’mirlash uchun 738 million so‘m mablag‘ ajratilishi ko‘zda tutilgan edi. Ammo joriy yilning mart oyiga rejalashtirilgan ta’mirlash ishlari hanuzgacha boshlanmagan.
Bugun Qo‘shtepa tumanidagi “Shakar” mahallasida 387 nafar bog‘cha yoshidagi bolalar bor. Ularning 58 nafari 21-sonli, 11 nafari qo‘shni “Istiqlol” mahallasidagi 2-sonli, 5 nafari Marg‘ilon shahridagi 33-sonli bog‘chalarga qatnaydi.
Qolgan 313 nafar bolaning taqdiri nima bo‘ladi? Mavjud bog‘chani ta’mirlash, qo‘shimcha binolar qurish zarurligi nega mutasaddi rahbarlarni tashvishga solmaydi? Prezidentning maktabgacha ta’lim tizimini takomillashtirishga doir farmon va qarorlari Qo‘shtepa tumanida qachon ijro etiladi?
Ayni paytda Farg‘ona viloyatida davlat-xususiy sherikchiligi asosida 38 ta maktabgacha ta’lim muassasasi faoliyat yuritmoqda. Tadbirkorlar ko‘magida “Shakar” mahallasida ham ana shunday zamonaviy bog‘chalarni ishga tushirish mumkin emasmi?
“Daryo” mazkur bog‘cha bilan bog‘liq mavzuga yana qaytadi.
Izoh (0)