O‘tgan uch oy mobaynida jinoyat ishlari bo‘yicha Mirzo Ulug‘bek tuman sudi tomonidan voyaga yetmaganlar orasida beshta jinoiy ish ko‘rilib, oltita shaxs javobgarlikka tortilgan. Bu haqda jinoyat ishlari bo‘yicha Mirzo Ulug‘bek tuman sudi sudyasi Farrux To‘raxo‘jayev “Daryo”ga ma’lum qildi.
Aksariyat hollarda voyaga yetmaganlar orasida o‘g‘rilik, tan jarohati yetkazish, haqoratlash, bezorilik kabi jinoyatlar kuzatiladi. Masalan, “Feruza” mahallasi xududidagi 205-maktabda o‘tkazilgan sayyor sud majlisida o‘g‘rilikka qo‘l urgan voyaga yetmagan uch nafar yosh, ya’ni Mo‘minov, Sahobiddinov va Ilhombekovning ishi ko‘rib chiqildi.
Ular Jinoyat Kodeksining 169-moddasi 2-qismi “b”, “v”, “g” bandlarida ko‘rsatilgan jinoyatlarni sodir etganliklari aniqlangan bo‘lib, jinoyatlari uchun qat’iy belgilangan jazoni o‘tashlari kerak edi. Biroq Yoshlar ittifoqining Mirzo Ulug‘bek tumani kengashi kafilligi va mahalla faollari kafilligi sabab Mo‘minovga bir yil ozodlikdan cheklash, Sahobiddinov va Ilhombekovga esa olti oy ozodlikdan cheklash jazosi belgilandi.
O‘g‘rilikda ayblangan Mavlonxo‘jayev kasb-hunar kolleji o‘quvchisi. Yaxshi oilaning farzandi, hech qanday muammosi bo‘lmay turib, kursdoshining cho‘ntagidan uy kalitini olib, uning uyiga o‘g‘rilikka tushadi. Uydagi bor pul va tilla taqinchoqlarni olib chiqib ketadi. U Jinoyat kodeksi 169 moddasi 2-qismi “g” bandida nazarda tutilgan jinoyatni sodir etganlikda aybli deb topilib, unga shu modda bilan Jinoyat kodeksining 82-moddasi tartibida eng kam oylik ish haqining 15 baravari miqdorida jarima tayinlandi.
Izoh (0)