Қорақалпоғистонда илк бор пахтани кластер усулида етиштириш йўлга қўйилмоқда

Қорақалпоғистон Республикасидаги 3473 фермер хўжалигининг 87791 гектар ерида парваришланаётган ғўза навлари баравж ўсмоқда. Бу ҳақда ЎзА хабар берди.

Далада иш қизғин, айни пайтда яганалаш ва бегона ўтлардан тозалаш ишлари якунига етказилди.

— Энг муҳими, бу ишларга бюджет ташкилоти ёки бошқа муассасалардан ходимлар жалб қилинмади, — дейди Қорақалпоғистон Республикаси Бандлик ва меҳнат муносабатлари вазирлиги ходими Мақсет Измуратов. — Июнь ойида ҳудудда 24118 ишсиз фуқаро жамоат ишларига жалб қилиниб, бунга 9 миллиард 582 миллион сўм ажратилди. Шундан 19796 фуқаро қишлоқ хўжалиги ишларига жалб қилинди. Уларга 6 миллиард 312 миллион сўм маблағ сарфланди.

Қорақалпоғистонда жорий йилда илк бор пахтани кластер усулида етиштириш йўлга қўйилмоқда.

Элликқалъа туманида «Bo`ston cluster» масъулияти чекланган жамияти ташкил этилиб, у ерда 381 фермер хўжалиги томонидан 11040 гектар майдонда пахта етиштириш режалаштирилган. Жамият ва фермер хўжаликлари ўртасида шартномалар тузилди.

Мазкур шартномаларга асосан фермер хўжаликлари томонидан жами 24264 тонна пахта етказиб берилади. Етиштириладиган хом ашёдан 9000 тонна тола олиниб, 8000 тонна ип-калава тайёрланиши ва ушбу маҳсулотдан 5 миллион погонометр жинси матоси ишлаб чиқарилиши режалаштирилган. Шу билан бирга, жамият томонидан 150 иш ўрни яратилган бўлиб, йил якунига қадар бу кўрсаткични 600 га етказиш режалаштирилган.