Buxoroda turmush o‘rtog‘ining o‘limidan tushkunlikka tushgan fuqaro va uning qarindoshlari marhumaga tibbiy yordam ko‘rsatish befoyda ekanligini bildirgan shifokorga tan jarohati yetkazdi. Bu haqda Buxoro viloyati IIB matbuot xizmati “Daryo” ga xabar bermoqda.
Aka-ukalar hamda ularning otasi K.R. Kogon shahar tibbiyot birlashmasi reanimatsiya bo‘limida J.A.ning turmush o‘rtog‘i M.A. vafot etganidan so‘ng unga tibbiy muolajalar ko‘rsatishning foydasiz ekanligini tushuntirgan shifokor Sh. B.ni yuz, chakka va burun sohalariga bir necha marotaba qo‘l va oyoqlari bilan qasddan urib “bosh miya lat yeyishi yengil darajasi, o‘ng yonoq suyagini ikki joyidan yopiq sinib siljishi, gaymoral bo‘shliq old devorining yopiq sinib siljishi” kabi o‘rta og‘irlikdagi tan jarohatlari yetkazgan.
Shuningdek, ular shu kuni yuqoridagi holatni bartaraf qilmoqchi bo‘lgan reanimatsiya bo‘limi feldsheri F.Q.ni bosh va bel sohalariga qo‘l va oyoqlari bilan urib, “bosh miya chayqalishi, o‘ng tomon yagona buyrak lat yeyishi, yuqori labi chap yarmi ichki qon quyilishi va shilinma, bosh miya chap tepa sohasida qontalash” kabi sog‘liqni qisqa muddatga buzilishiga sabab bo‘lgan yengil tan jarohatlari yetkazgan.
Jinoyat ishlari bo‘yicha Kogon shahar sudi ishni mazmunan ko‘rib chiqib, sudlanuvchilar K.R. va aka-ukaning qonunga xilof qilmishlari Jinoyat Kodeksining 105-moddasi (Qasddan badanga o‘rtacha og‘ir shikast yetkazish 2-qismi “v,i” bandlari va 109-moddasi (Qasddan badanga yengil shikast yetkazish) 2-qismida nazarda tutilgan jinoyat tarkibini tashkil qilsa-da, sudlanuvchilarning harakatlari og‘ir oqibat keltirib chiqarmaganligi, qilmishidan pushaymonligi, og‘ir ruhiy iztirob, ya’ni marhuma M.A.ning o‘limi natijasida kelib chiqqan tushkunlik holatida jinoyat sodir etganliklari, ijobiy tavsifnomasi, jabrlanuvchilarning da’vosi yo‘qligini inobatga olib, ular tomonidan sodir etilgan qilmish ijtimoiy xavflilik xususiyatini yo‘qotgan deb topdi va Jinoyat Kodeksining 65-moddasiga asosan, ularni javobgarlikdan ozod etib, jinoyat ishini O‘zbekiston Respublikasi JPKning 84-moddasi 5-qismi, 1-bandiga asosan harakatdan tugatdi.
Izoh (0)