Бухорода турмуш ўртоғининг ўлимидан тушкунликка тушган фуқаро ва унинг қариндошлари марҳумага тиббий ёрдам кўрсатиш бефойда эканлигини билдирган шифокорга тан жароҳати етказди. Бу ҳақда Бухоро вилояти ИИБ матбуот хизмати «Дарё» га хабар бермоқда.
Ака-укалар ҳамда уларнинг отаси К.Р. Когон шаҳар тиббиёт бирлашмаси реанимация бўлимида Ж.А.нинг турмуш ўртоғи М.А. вафот этганидан сўнг унга тиббий муолажалар кўрсатишнинг фойдасиз эканлигини тушунтирган шифокор Ш. Б.ни юз, чакка ва бурун соҳаларига бир неча маротаба қўл ва оёқлари билан қасддан уриб «бош мия лат ейиши енгил даражаси, ўнг ёноқ суягини икки жойидан ёпиқ синиб силжиши, гайморал бўшлиқ олд деворининг ёпиқ синиб силжиши» каби ўрта оғирликдаги тан жароҳатлари етказган.
Шунингдек, улар шу куни юқоридаги ҳолатни бартараф қилмоқчи бўлган реанимация бўлими фелдшери Ф.Қ.ни бош ва бел соҳаларига қўл ва оёқлари билан уриб, «бош мия чайқалиши, ўнг томон ягона буйрак лат ейиши, юқори лаби чап ярми ички қон қуйилиши ва шилинма, бош мия чап тепа соҳасида қонталаш» каби соғлиқни қисқа муддатга бузилишига сабаб бўлган енгил тан жароҳатлари етказган.
Жиноят ишлари бўйича Когон шаҳар суди ишни мазмунан кўриб чиқиб, судланувчилар К.Р. ва ака-уканинг қонунга хилоф қилмишлари Жиноят Кодексининг 105-моддаси (Қасддан баданга ўртача оғир шикаст етказиш 2-қисми «в,и» бандлари ва 109-моддаси (Қасддан баданга енгил шикаст етказиш) 2-қисмида назарда тутилган жиноят таркибини ташкил қилса-да, судланувчиларнинг ҳаракатлари оғир оқибат келтириб чиқармаганлиги, қилмишидан пушаймонлиги, оғир руҳий изтироб, яъни марҳума М.А.нинг ўлими натижасида келиб чиққан тушкунлик ҳолатида жиноят содир этганликлари, ижобий тавсифномаси, жабрланувчиларнинг даъвоси йўқлигини инобатга олиб, улар томонидан содир этилган қилмиш ижтимоий хавфлилик хусусиятини йўқотган деб топди ва Жиноят Кодексининг 65-моддасига асосан, уларни жавобгарликдан озод этиб, жиноят ишини Ўзбекистон Республикаси ЖПКнинг 84-моддаси 5-қисми, 1-бандига асосан ҳаракатдан тугатди.
Изоҳ (0)