GM Uzbekistan kompaniyasi avtosalonlarda Damas avtomobili xaridorlaridan qo‘shimcha tilxat yozdirib olinayotgani haqida Telegram’da paydo bo‘lgan xabarlarni tasdiqlamadi. Bu haqda kompaniyaning Jamoatchilik bilan aloqalar xizmati “Daryo”ga ma’lum qildi.
6—7-iyun kunlari Telegram’dagi ommabop kanallarda avtosalonlar Damas xaridorlaridan mashinani ba’zi detallarsiz olishga rozilik haqida tilxat olayotganiga doir xabarlar paydo bo‘lgan edi. Surati e’lon qilingan tilxatlardan biri PSM Avtosavdo, yana biri Poytaxt-Avtosavdo avtosaloniga tegishli ekani ta’kidlangan edi. Tilxatlarda, jumladan, xaridor Damas avtomobilini magnitofon, antenna, yon tomonidagi DLX (Deluxe) belgisi, orqa eshikning pastki qismidagi oyoq qo‘ygich va g‘ildirak lappaklari (kalpaklari)siz qabul qilishi haqida oldindan ogohlantirilgani va bunga rozi bo‘lgani qayd etilgan.
Ba’zi manbalar bu tilxatlar detallarning narxi oshgani, biroq Damas’larning umumiy narxini oshirmaslik uchun ko‘rilayotgan chora doirasida yozdirilayotganini ma’lum qilgan. GM Uzbekistan kompaniyasi Jamoatchilik bilan aloqalar xizmatining “Daryo”ga ma’lum qilishicha, bu borada internetda tarqatilgan ma’lumotlar haqiqatga to‘g‘ri kelmaydi.
Bugungi kunda kompaniya tomonidan ishlab chiqarilayotgan avtomobillarning tannarxini tushirish yuzasidan o‘rganish ishlari olib borilmoqda. Biroq internetda tarqatilgan ma’lumotlar haqiqatga to‘g‘ri kelmaganligi bois kompaniya buni tasdiqlamaydi.Ma’lumot uchun, “O‘zavtosanoat” kompaniyasi tomonidan 31-may kuni o‘tkazilgan matbuot anjumanida yaqin vaqt ichida GM Uzbekistan tomonidan ishlab chiqarilayotgan yengil avtomobillar narxlarini oshirish rejasi yo‘qligi ma’lum qilingan edi. “Biz narxlarni oshirish tarafdori emasmiz”, — degandi o‘sha matbuot anjumanida “O‘zavtosanoat” rahbari Umidjon Salimov.Mijozlardan shunday tilxatlarni to‘ldirish so‘ralgan holatlarda (+998-71) 141-77-77 telefon raqami orqali kompaniya koll-markaziga murojaat qilishlarini so‘raymiz.
GM Uzbekistan Jamoatchilik bilan aloqalar xizmati
Izoh (0)