Erdo‘g‘on Turkiyada Uber taksi servisi taqiqlanganini e’lon qildi

Uber taksi xizmati Turkiyada taqiqlandi. Bu haqda mamlakat prezidenti Rajab Toyyib Erdo‘g‘on ma’lum qildi, deya xabar bermoqda Daily Sabah.

“Uber’ning Turkiyadagi biznesi tamom bo‘ldi. U endi yo‘q”, — dedi Erdo‘g‘on. Uning ta’kidlashicha, Turkiyaning o‘z taksi tizimi bor va qandaydir xususiy tashish xizmati turk taksistlarining biznesini vayron qilishga hech kim yo‘l qo‘ymaydi.

Uber 2014-ili Turkiyada faoliyat boshlaganidan so‘ng mamlakatdagi an’anaviy taksi haydovchilar norozilik bildirgan, noxolis raqobatdan shikoyat qilgan edi. Mamlakatda faqat 5 ming haydovchigina Uber tizimida ishlardi, xolos.

Turkiya poytaxtida 17 mingdan ziyod rasmiy sariq taksi mavjud bo‘lib, u ham shahar transport tizimining asoslaridan biri sanaladi.

Kuzatuvchilarning ta’kidlashicha, ushbu taksistlar tomonidan ko‘rsatilayotgan xizmat sifatining pastligi, xizmat haqining haddan ziyod yuqoriligi kabi omillar Uber’ga Turkiyada muvaffaqiyat qozonish imkonini bermoqda edi.

Ayni vaqtda, Turkiya politsiyasi yil boshidan beri Istanbuldagi Uber haydovchilariga 18,9 million lira (4 million dollardan ko‘proq) miqdorida jarima solgan.

Uber’dan foydalanishni taqiqlagan Turkiya avvalroq xuddi shunday qaror qabul qilgan Bolgariya, Daniya, Vengriya kabi davlatlar qatoriga qo‘shildi.

Aprel oyida Vena tijoriy sudi Avstriya poytaxtida Uber taksi xizmati faoliyatini taqiqlagan edi. Sudning fikricha, Uber’ning ish uslubi Vena taksichilari uchun o‘rnatilgan qoidalariga muvofiq emas.

2017-yilning sentabrida Londonda ham Uber taqiqlangan edi. Fransiya, Germaniya, Italiya, Yaponiya va Tayvanda ham servis faoliyati cheklangan.