Samarqand viloyat hokimi Turobjon Jo‘rayev rahbarligida Samarqand turizm kollejida Sartepa maskani hududini ijtimoiy-muhandislik, yo‘l infratuzilmasi hamda ko‘p qavatli uy-joy fondini ta’mirlash va atrofini obodonlashtirishga bag‘ishlangan yig‘ilish o‘tkazildi. Bu haqda “Daryo” muxbiri Farhod Norbo‘tayev xabar bermoqda.
Yig‘ilishda qayd etilishicha, O‘zbekiston Respublikasi Prezidenti Shavkat Mirziyoyevning 2018-yil 16-martdagi qarori bilan tashkil etilgan “Samarqand viloyatini obodonlashtirish va farovonligini oshirish jamg‘armasi”ga 50 million dollar miqdorida mablag‘ ajratilgan.
Prezidentning 17—18-mart kunlari Samarqand viloyatiga amalga oshirgan tashrifi davomida bergan topshiriqlari ijrosini ta’minlash maqsadida bir qator ishlar amalga oshirildi.
Jumladan, viloyat hokimligi tomonidan ijtimoiy-iqtisodiy, muhandislik va yo‘l infratuzilmasini yaxshilash, ko‘rsatilayotgan kommunal xizmatlar sifatini oshirish va sohadagi mavjud muammolarni bartaraf etish yuzasidan jami 334,4 milliard so‘mlik chora-tadbirlar dasturi ishlab chiqildi.- Shundan 71,7 milliard so‘mi shaharning Sartepa, So‘g‘diyona, Mikrorayon “A” va “B” maskanlari hududidagi jami 317 ta ko‘p qavatli uy-joylarni mukammal ta’mirlash va unga tutash hududlarni obodonlashtirish ishlariga;
- 14,2 milliard so‘mi Samarqand shahrining Sartepa maskanidagi 22 ta ko‘p qavatli uy-joylardagi 71 ta lift moslamalarini to‘liq yangisiga almashtirishga;
- 26,5 milliard so‘mi shahar obodonlashtirish boshqarmasiga 63 ta turli avtotexnika vositalari va 40 ta o‘t o‘rish uskunalari xarid qilib, uning moddiy-texnik bazasini rivojlantirishga;
- 6,6 milliard so‘mi Samarqand shahrining tungi yoritish tizimini yaxshilashga, bunda shaharning 20 ta markaziy ko‘chasidagi tungi yoritish chiroqlarini ta’mirlash, Kimyogarlar, Farhod, So‘lim qo‘rg‘onlaridagi hamda Sartepa, Mikrorayon, So‘g‘diyona maskanlaridagi ichki tungi yoritish tizimlarini mukammal ta’mirlash, shuningdek, Amir Temur, Sulaymon Buxoriy, Tong, Ali Qushchi ko‘chalarida yangi kabel tortib, zamonaviy svetodiot chiroqlari o‘rnatish ishlariga;
- 93,3 milliard so‘mi 28,5 kilometr masofada yo‘l qurish, rekonstruksiya qilish va mukammal ta’mirlash ishlarini bajarishga;
- 11,6 milliard so‘mi Samarqand shahridagi 5 ta asosiy ko‘chada piyodalar uchun yo‘l o‘tkazgich ko‘priklari qurishga va 2 ta ko‘chadagi mavjud yer osti o‘tish yo‘lagini rekonstruksiya qilishga;
- 35,2 milliard so‘mi Samarqand shahrida 4 ta markazlashgan issiqlik uzatish qozonxonalarini qurib, issiqlik ta’minotini qayta tiklashga;
- 71,2 milliard so‘mi Samarqand shahrining ichimlik suv ta’minoti va oqova xizmatlari ko‘rsatilishini yaxshilashga va, bunda Sartepa Mikrorayon, So‘g‘diyona maskanlaridagi ichki tarmoqlarni to‘liq yangilashga, 14 ta ko‘chada ichimlik suvi tarmoqlari hamda 4 ta ko‘chada oqova suv tarmog‘i qurishga hamda “Charxin” suv inshootini rekonstruksiya qilishga;
- 3,8 milliard so‘mi Samarqand shahrining Amir Temur, Buyuk Ipak yo‘li, Turkiston, Ali Qushchi, Rudakiy va O‘zbektrakt ko‘chalarini obodonlashtirish va ko‘kalamzorlashtirilgan qismining sun’iy sug‘orish tizimini yaxshilab, qo‘shimcha suv nasoslari o‘rnatish ishlariga yo‘naltirish belgilandi.
Ajratilgan mablag‘lardan o‘z o‘rnida va samarali foydalanish uchun viloyat hokimligida bosh shtab hamda hududlarda 4 ta shtab tashkil etildi. Ular tomonidan bajarilayotgan ishlar ko‘lami va sifati “Mahalla” jamoat fondi va “Nuroniy” jamg‘armasi shahar bo‘limlari faollari tomonidan nazorat qilib boriladi.
Izoh (0)