Самарқанд вилоят ҳокими Туробжон Жўраев раҳбарлигида Самарқанд туризм коллежида Сартепа маскани ҳудудини ижтимоий-муҳандислик, йўл инфратузилмаси ҳамда кўп қаватли уй-жой фондини таъмирлаш ва атрофини ободонлаштиришга бағишланган йиғилиш ўтказилди. Бу ҳақда «Дарё» мухбири Фарҳод Норбўтаев хабар бермоқда.
Йиғилишда қайд этилишича, Ўзбекистон Республикаси Президенти Шавкат Мирзиёевнинг 2018 йил 16 мартдаги қарори билан ташкил этилган «Самарқанд вилоятини ободонлаштириш ва фаровонлигини ошириш жамғармаси»га 50 миллион доллар миқдорида маблағ ажратилган.
Президентнинг 17—18 март кунлари Самарқанд вилоятига амалга оширган ташрифи давомида берган топшириқлари ижросини таъминлаш мақсадида бир қатор ишлар амалга оширилди.
Жумладан, вилоят ҳокимлиги томонидан ижтимоий-иқтисодий, муҳандислик ва йўл инфратузилмасини яхшилаш, кўрсатилаётган коммунал хизматлар сифатини ошириш ва соҳадаги мавжуд муаммоларни бартараф этиш юзасидан жами 334,4 миллиард сўмлик чора-тадбирлар дастури ишлаб чиқилди.- Шундан 71,7 миллиард сўми шаҳарнинг Сартепа, Сўғдиёна, Микрораён «А» ва «Б» масканлари ҳудудидаги жами 317 та кўп қаватли уй-жойларни мукаммал таъмирлаш ва унга туташ ҳудудларни ободонлаштириш ишларига;
- 14,2 миллиард сўми Самарқанд шаҳрининг Сартепа масканидаги 22 та кўп қаватли уй-жойлардаги 71 та лифт мосламаларини тўлиқ янгисига алмаштиришга;
- 26,5 миллиард сўми шаҳар ободонлаштириш бошқармасига 63 та турли автотехника воситалари ва 40 та ўт ўриш ускуналари харид қилиб, унинг моддий-техник базасини ривожлантиришга;
- 6,6 миллиард сўми Самарқанд шаҳрининг тунги ёритиш тизимини яхшилашга, бунда шаҳарнинг 20 та марказий кўчасидаги тунги ёритиш чироқларини таъмирлаш, Кимёгарлар, Фарҳод, Сўлим қўрғонларидаги ҳамда Сартепа, Микрораён, Сўғдиёна масканларидаги ички тунги ёритиш тизимларини мукаммал таъмирлаш, шунингдек, Амир Темур, Сулаймон Бухорий, Тонг, Али Қушчи кўчаларида янги кабел тортиб, замонавий светодиот чироқлари ўрнатиш ишларига;
- 93,3 миллиард сўми 28,5 километр масофада йўл қуриш, реконструкция қилиш ва мукаммал таъмирлаш ишларини бажаришга;
- 11,6 миллиард сўми Самарқанд шаҳридаги 5 та асосий кўчада пиёдалар учун йўл ўтказгич кўприклари қуришга ва 2 та кўчадаги мавжуд ер ости ўтиш йўлагини реконструкция қилишга;
- 35,2 миллиард сўми Самарқанд шаҳрида 4 та марказлашган иссиқлик узатиш қозонхоналарини қуриб, иссиқлик таъминотини қайта тиклашга;
- 71,2 миллиард сўми Самарқанд шаҳрининг ичимлик сув таъминоти ва оқова хизматлари кўрсатилишини яхшилашга ва, бунда Сартепа Микрораён, Сўғдиёна масканларидаги ички тармоқларни тўлиқ янгилашга, 14 та кўчада ичимлик суви тармоқлари ҳамда 4 та кўчада оқова сув тармоғи қуришга ҳамда «Чархин» сув иншоотини реконструкция қилишга;
- 3,8 миллиард сўми Самарқанд шаҳрининг Амир Темур, Буюк Ипак йўли, Туркистон, Али Қушчи, Рудакий ва Ўзбектракт кўчаларини ободонлаштириш ва кўкаламзорлаштирилган қисмининг сунъий суғориш тизимини яхшилаб, қўшимча сув насослари ўрнатиш ишларига йўналтириш белгиланди.
Ажратилган маблағлардан ўз ўрнида ва самарали фойдаланиш учун вилоят ҳокимлигида бош штаб ҳамда ҳудудларда 4 та штаб ташкил этилди. Улар томонидан бажарилаётган ишлар кўлами ва сифати «Маҳалла» жамоат фонди ва «Нуроний» жамғармаси шаҳар бўлимлари фаоллари томонидан назорат қилиб борилади.
Изоҳ (0)