Bosh prokuraturada Sergeli tumanida joylashgan yotoqxonalardan birida yashovchi fuqarolar qabul qilindi. Bu haqda mahkama matbuot xizmati ma’lum qildi.
Aniqlanishicha, fuqaro A.T. Nova Universal MChJ rahbari bo‘la turib, O‘zbekiston Respublikasi IIV balansida bo‘lgan 9 qavatli yotoqxona binosini zamonaviy mehmonxona majmuasi qurish uchun 300 million so‘m investitsiya kiritish sharti bilan tender tanlovida “nol” qiymatda sotib olgan.
Nova Universal MChJ va Davlat mulk qo‘mitasi Toshkent shahar boshqarmasi o‘rtasida 2005-yil 15-sentabrda yotoqxona binosining oldi-sotdi shartnomasi tuzilgan. A.T. investitsiya majburiyatlarini bajarganligi haqida hujjatlarni soxtalashtirib, 2007-yil 8-yanvarda binoga egalik huquqini beruvchi 2-sonli davlat orderini olgan.
Shundan so‘ng, A.T. ushbu yotoqxonaning uy-joy fondiga kiritilmagan 27 ta xonadonini fuqarolarga hujjatlarini keyinchalik tegishli tartibda rasmiylashtirishga va’da berib, 103,4 million so‘mga sotib yuborgan.
Jinoyat ishlari bo‘yicha Sergeli tuman sudining 2011-yil 4-apreldagi hukmiga ko‘ra, A.T. Jinoyat kodeksining 168-moddasi 3-qismi “a, v” bandlari va boshqa moddalarida nazarda tutilgan jinoyatlarni sodir etganlikda aybli deb topilib, unga 9 yil muddatga ozodlikdan mahrum qilish jazosi tayinlangan.
Shuningdek, sud hukmi bilan sudlanuvchidan jabrlanuvchilar foydasiga 103,4 million so‘m zarar summasi undirilgan. Biroq, jabrlanuvchilar olingan xonadonlarga nisbatan mulk huquqini qonuniylashtirishni talab qilib, ushbu pul mablag‘ini olishni rad etgan.
Bosh prokuratura aralashuvidan so‘ng qayd etilgan oilalarni uy-joy bilan ta’minlashga qaratilgan qator chora-tadbirlar amalga oshirildi.
Izoh (0)