Navoiy viloyatida pillachilikni rivojlantirish borasida amalga oshirilayotgan ishlar o‘zining yuksak samaralarini bermoqda. Jumladan, mavjud tutzorlar kengaytirilib, ko‘chatlar safi to‘ldirildi, deya xabar beradi O‘zA.
Pilla klaster usulida yetishtirilmoqda. “Karmana pilla xazinasi”, “Navoiy ipak qurti urug‘i”, “Karmana Al-Aziz ipagi” mas’uliyati cheklangan jamiyatlari hamda “Xatirchi pilla xazinasi” xususiy korxonasi bu borada ijobiy natijalarga erishmoqda.
— Sohada tajribaga ega qator fermer va oilaviy xo‘jaliklar pilla parvarishidek juda nozik ishni yakuniga yetkazib, yetishtirilgan hosilni buyurtmachilarga yetkazib bermoqda, — deydi “Navoiy hududiy agropilla” mas’uliyati cheklangan jamiyati bosh agronomi X.Ochilov. — Ipak qurti parvarishida ularga yetakchi mutaxassislarimiz yaqindan ko‘maklashdi. Natijada hosildorlik ortdi. Ayni kungacha tarqatilgan 1135 quti ipak qurtining hosili terilib, korxonalarga 63,3 tonna pilla topshirildi. Uning bir qismi eng sifatli nav — urug‘lik uchun saralandi. O‘rtacha hosildorlik bir qutidan 56 kilogrammni tashkil etmoqda.
Karmana tumanidagi “Sevoltepa ravnaqi”, Qiziltepa tumanidagi “Nigorabonu Sevaraxon”, “Ahmad Namoz”, Navbahor tumanidagi “Qahhor Said” fermer xo‘jaliklari pillakorlari belgilangan rejani ortig‘i bilan bajardi.
Viloyatda pilla topshirish davom etmoqda.
Izoh (0)