31-mayning e’tiborga molik yangiliklari — “Daryo”ning kechki dayjestida.
1. Sobiq bosh prokuror Rashidjon Qodirov mahbuslar shifoxonasiga yotqizildi. Ma’lumot uchun, Qodirov fevraldan beri tergov qilinyapti. U tovlamachilik, mansab vakolatini suiiste’mol qilish, pora olishda ayblanyapti.
2. “O‘zavtosanoat” rahbari: Avtosanoat monopoliyasiga barham berish — ustuvor vazifamiz. Aytishlaricha, GM Uzbekistan’ning Asakadagi avtozavodi yil oxirigacha to‘liq “O‘zavtosanoat”niki bo‘ladi. Avtozavod nomi o‘zgaradi.
3. Rasman: YChLni ketma-ket 3-marta yutgan Zinedin Zidan “Real”dan ketishini e’lon qildi. Afsonaviy futbolchidan afsonaviy murabbiyga aylangan Zidanning aytishicha, “Real” yana g‘alaba qozonishi uchun tanaffus kerak.
4. GM Uzbekistan Matiz avtomobillarini ishlab chiqarishni to‘xtatmoqda. “O‘zavtosanoat” rahbariyatining ma’lum qilishicha, yaqin vaqt ichida Captiva ham konveyerdan olinadi.
5. Toshkentda sud YPX xodimini sudrab ketgan avtomobil o‘g‘risiga 11 yil qamoq jazosi tayinladi. Ayblanuvchiga nisbatan Jinoyat kodeksining bir emas, beshta moddasi bo‘yicha ish ochilgan edi. U muqaddam sudlangan ham edi.
6. “O‘zavtosanoat” elektromobillar ustida ish olib boryapti. Bir oy ichida sinov uchun ikki elektrokar Toshkentga keltiriladi. Toshkentdagi Turin politexnika universitetida esa “O‘zavtosanoat” buyurtmasi asosida haydovchisiz harakatlanadigan avtomobil ishlab chiqilmoqda.
7. “O‘zbekkonsert” Sardor Rahimxon, Feruza Jumaniyozova, Asilbek Nig‘matov hamda Tohir Usmonovlarning litsenziyasini olib qo‘ydi. Ma’lum bo‘lishicha, ular “O‘zbekkonsert”dagi odobnoma darslariga besabab kelishmagan.
Izoh (0)