Tojikiston perzidenti Emomali Rahmon 30-may kuni Imom A’zam Abu Xanifa ibn Sobit nomidagi Tojikiston islom institutining yangi binosiga tamal toshini qo‘ydi, deb xabar berdi “News.tj”.
Institutning yangi binosida 1,5 ming nafar talaba tahsil olishi mumkin. Uch gektar maydonni egallaydigan bino uchun 136 million somon (salkam 15 million dollar) ajratilgan.
Loyihaga ko‘ra, mazkur oliy ta’lim muassasasining asosiy binosi 5 ta yetti qavatli blokdan—o‘quv korpuslari, bino ma’muriyati, yotoqxona, sport zali, oshxona, kutubxona va anjumanlar zalidan iborat bo‘ladi.
Loyihaning taqdimoti vaqtida Emomali Rahmonga institut yotoqxonasi 1,5 ming kishiga mo‘ljallangani, oshxonada 490 ta o‘rin borligi, anjumanlar zaliga 550 kishi sig‘ishi haqida ma’lumot berilgan.
Tojikiston islom institutiga mamlakat prezidenti tomonidan 2007-yilning 2-noyabrida asos solingan. Bunga qadar institut Imom at-Termiziy nomi bilan atalgan. 2008-yilda esa uning nomi prezident farmoniga asosan o‘zgartirilgan. Hozirda ushbu institut 1400 nafar talaba tahsil oladigan Tojikistondagi yagona islom oliy ta’lim muassasasi hisoblanadi.
Institutga o‘qishga kirish uchun abituriyentlar yozma ravishda fors-tojik tili va adabiyoti bo‘yicha imtihon (insho) topshiradi.
Izoh (0)