Тожикистон перзиденти Эмомали Раҳмон 30 май куни Имом Аъзам Абу Ханифа ибн Собит номидаги Тожикистон ислом институтининг янги биносига тамал тошини қўйди, деб хабар берди «News.tj».
Институтнинг янги биносида 1,5 минг нафар талаба таҳсил олиши мумкин. Уч гектар майдонни эгаллайдиган бино учун 136 миллион сомон (салкам 15 миллион доллар) ажратилган.
Лойиҳага кўра, мазкур олий таълим муассасасининг асосий биноси 5 та етти қаватли блокдан—ўқув корпуслари, бино маъмурияти, ётоқхона, спорт зали, ошхона, кутубхона ва анжуманлар залидан иборат бўлади.
Лойиҳанинг тақдимоти вақтида Эмомали Раҳмонга институт ётоқхонаси 1,5 минг кишига мўлжаллангани, ошхонада 490 та ўрин борлиги, анжуманлар залига 550 киши сиғиши ҳақида маълумот берилган.
Тожикистон ислом институтига мамлакат президенти томонидан 2007 йилнинг 2 ноябрида асос солинган. Бунга қадар институт Имом ат-Термизий номи билан аталган. 2008 йилда эса унинг номи президент фармонига асосан ўзгартирилган. Ҳозирда ушбу институт 1400 нафар талаба таҳсил оладиган Тожикистондаги ягона ислом олий таълим муассасаси ҳисобланади.
Институтга ўқишга кириш учун абитуриентлар ёзма равишда форс-тожик тили ва адабиёти бўйича имтиҳон (иншо) топширади.
Изоҳ (0)