Hukumat portalida Toshkent shahar hokimligining “Toshkent shahrida daraxtlar himoyasini kuchaytirish, noqonuniy kesilish holatlarining oldini olish, tadbirkorlik va shaharsozlik faoliyati uchun yer uchastkalarini ajratishda daraxtlar va ko‘p yillik butalarni himoya qilish tizimini tashkillashtirish haqida”gi qarori loyihasi e’lon qilindi.
Hujjat muhokamasi 30-mayga qadar davom etadi.
Qonun loyihasida quyidagi takliflar ilgari surilgan:
- obodonlashtirish bosh boshqarmasi tizimida daraxtlar va ko‘p yillik o‘simliklarni himoya qilish boshqarmasini tashkil etish;
- O‘simliklarni himoya qilish instituti va boshqa tashkilotlar bilan hamkorlikda ko‘p yillik o‘simliklarga agrotexnik ishlov berish qoidalarini ishlab chiqish;
- fanlar akademiyasi Genomika va bioinformatika markazi, O‘simliklarni himoya qilish instituti va boshqa tashkilotlar bilan hamkorlikda zararkurandalarga qarshi daraxtlar va ko‘p yillik o‘simliklarga kimyoviy ishlov berish qoidalari loyihasini ishlab chiqish;
- Toshkent shahar arxitektura bosh boshqarmasining yer ajratish haqidagi hujjatlarida ajratilishi belgilanayotgan hududlardagi ko‘p yillik o‘simliklar va daraxtlarning aniq soni, tanasining yo‘g‘onligi, turi haqidagi ma’lumotlarning ko‘rsatilishi.
- Toshkent shahrida daraxt kesish, butash ishlarini bajarish Ekologiya va atrof-muhitni muhofaza qilish qo‘mitasi qoshidagi Bioinspeksiya tomonidan beriladigan ruxsatnoma asosida Obodonlashtirish bosh boshqarmasi tizimi tomonidan amalga oshirilishi;
- daraxt kesish uchun beriladigan ruxsatnomalarni Toshkent shahar hokimligining rasmiy saytiga joylashtirish va kesilishi belgilangan daraxtlar haqida internet tarmog‘i orqali e’lon qilish;
- har bir kesilgan daraxt uchun 10 tup daraxt ekish qoidasini o‘rnatish taklif qilingan.
Izoh (0)