Yoshlar ittifoqi qoshidagi kengash yosh fermerlarni Yaponiyaga malaka oshirishga jo‘natdi. Bu haqda Qahramon Quronboyev Facebook’dagi sahifasida ma’lum qildi.
Shu yilning 9-mayidan 5-iyuniga qadar Yaponiyaning Xokkaydo shahrida Markaziy Osiyo davlatlari fermerlari uchun “Markaziy Osiyo mamlakatlarida fermer xo‘jaliklarini rivojlantirish” mavzusida xalqaro o‘quv-seminar bo‘lib o‘tmoqda. Unda O‘zbekiston yosh fermerlari kengashi va Yaponiya xalqaro hamkorlik agentligi (JICA) o‘rtasidagi kelishuv dasturi bo‘yicha o‘zbekistonlik yosh fermerlar ham ishtirok etmoqda.
Jumladan, Toshkent viloyati, Yangiyo‘l tumanidagi Grain Well Group fermer xo‘jaligi rahbari Alisher Tursunov va Sirdaryo viloyati, Sirdaryo tumanidagi “Islombek Sarvarbek Behruz” fermer xo‘jaligi rahbari Islom Hotamov seminarga yuborildi.
Seminarda ko‘p tarmoqli fermer xo‘jaliklarini rivojlantirishda innovatsion texnologiyalarning ahamiyati, shuningdek, qishloq xo‘jaligida Yaponiya va dunyo tajribasini o‘rganishga alohida e’tibor qaratilmoqda.
Hamkorlik kelishuvi bo‘yicha kelgusi oyda ham o‘zbekistonlik yosh fermerlar Yaponiyada tashkil etiladigan o‘quv-seminarda ishtirok etishi ko‘zda tutilgan.
Izoh (0)