18-mayning e’tiborga molik yangiliklari — “Daryo”ning kechki dayjestida.
1. Shavkat Mirziyoyev AQShdan Toshkentga qaytib keldi. Prezident Vashingtondan qaytishi bilan, Toshkent xalqaro aeroportida yangi “Drimlayner”ni ko‘zdan kechirdi.
2. Bekoboddagi peshonasiga “2” baho qo‘yilgan o‘quvchilar “o‘qituvchilar jangi” sabab jabrlangan. Mutasaddilar — peshonaga “2” qo‘yish holatlari haqida: “O‘qituvchilar yillar davomida jamoat ishlariga jalb qilingani o‘z ta’sirini ko‘rsatmoqda”.
3. O‘zbekistonda voyaga yetmaganlar o‘rtasida o‘z joniga qasd qilish holatlari o‘tgan yilgiga nisbatan 10 taga kamaydi. Yana bir e’tiborga molik fakt — 1-yanvardan 1-maygacha bo‘lgan oraliqda erta turmush qurish bilan bog‘liq 3 ta holat aniqlandi.
4. O‘zbekistonda harbiy xizmatchilarning farzandlari davlat grantlari asosida o‘qishga qabul qilinadi. Nafaqat harbiy xizmatchilar, ichki ishlar organlari, favqulodda vaziyatlar tizimi, Davlat xavfsizlik xizmati xodimlarining farzandlariga ham taalluqli bu.
5. Rossiyaning “KB Strelka” kompaniyasi Toshkent ko‘chalari qiyofasini o‘zgartiradi. Kompaniya vakillari hozirgi vaqtda Bobur, Nukus, Shahrisabz, Shota Rustaveli, Navoiy va Amir Temur ko‘chalarini ko‘rib chiqmoqda.
6. Toshkentda har bir kesilgan daraxt uchun 10 tup daraxt qoidasi o‘rnatiladi. Agar shahar hokimligining shu haqdagi qarori qabul qilinsa. Hozircha uning loyihasi muhokama uchun e’lon qilingan, muhokama 30-maygacha davom etadi.
7. Samarqandda “Afrosiyob” poyezdiga 5-sinf o‘quvchisi tosh uloqtirgani ma’lum bo‘ldi. “O‘quvchi va uning onasi bilan tushuntirish ishlari olib borildi”, — deyiladi Ichki ishlar vazirligi axborotida.
Izoh (0)