Quyi Chirchiqda ko‘prik yopib qo‘yildi. Endi tuman markaziga borish uchun 80 km yo‘l bosish kerak

Chirchiq daryosining quyi qismidagi Qo‘rg‘oncha qishlog‘ini Chinoz tumani markazi bilan bog‘laydigan ko‘prik yopib qo‘yildi. Bunga inshootning texnik nosozligi — asta-sekin cho‘kib borayotganligi sabab bo‘ldi, deya xabar beradi “Xalq so‘zi”.

Bu tadbir noxush holatlarning oldini olish maqsadida amalga oshirildi. Biroq ko‘pchilikni tashvishlantirayotgani mazkur ko‘prikni sozlash, ta’mirlash yoki qayta qurish uchun o‘tgan bir hafta davomida harakat sezilmadi.

Ko‘prikdan hozircha piyodalar o‘tib turibdi, avtomobil harakati esa to‘sib qo‘yilgan. Endi Quyi Chirchiq tumanidagi Qo‘rg‘oncha qishlog‘idan Chinoz tumani markaziga borish uchun avtomobilda avvalgidek 3 emas, 80 kilometr yo‘l bosib, Yangiyo‘l tumani markazi Gulbahor orqali borish lozim.

Yo‘lovchilarni ko‘prik boshidan Chinozgacha yoki u yerdan Qo‘rg‘onchagacha eltib qo‘yish uchun avtotransport hanuzgacha belgilanmadi. Bir haftadirki, kirakashlarning oshig‘i olcha bo‘lib qoldi. Yo‘l haqini ular xohlaganicha belgilamoqda.