18 майнинг эътиборга молик янгиликлари — «Дарё»нинг кечки дайжестида.
1. Шавкат Мирзиёев АҚШдан Тошкентга қайтиб келди. Президент Вашингтондан қайтиши билан, Тошкент халқаро аэропортида янги «Дримлайнер»ни кўздан кечирди.
2. Бекободдаги пешонасига «2» баҳо қўйилган ўқувчилар «ўқитувчилар жанги» сабаб жабрланган. Мутасаддилар — пешонага «2» қўйиш ҳолатлари ҳақида: «Ўқитувчилар йиллар давомида жамоат ишларига жалб қилингани ўз таъсирини кўрсатмоқда».
3. Ўзбекистонда вояга етмаганлар ўртасида ўз жонига қасд қилиш ҳолатлари ўтган йилгига нисбатан 10 тага камайди. Яна бир эътиборга молик факт — 1 январдан 1 майгача бўлган оралиқда эрта турмуш қуриш билан боғлиқ 3 та ҳолат аниқланди.
4. Ўзбекистонда ҳарбий хизматчиларнинг фарзандлари давлат грантлари асосида ўқишга қабул қилинади. Нафақат ҳарбий хизматчилар, ички ишлар органлари, фавқулодда вазиятлар тизими, Давлат хавфсизлик хизмати ходимларининг фарзандларига ҳам тааллуқли бу.
5. Россиянинг «КБ Стрелка» компанияси Тошкент кўчалари қиёфасини ўзгартиради. Компания вакиллари ҳозирги вақтда Бобур, Нукус, Шаҳрисабз, Шота Руставели, Навоий ва Амир Темур кўчаларини кўриб чиқмоқда.
6. Тошкентда ҳар бир кесилган дарахт учун 10 туп дарахт қоидаси ўрнатилади. Агар шаҳар ҳокимлигининг шу ҳақдаги қарори қабул қилинса. Ҳозирча унинг лойиҳаси муҳокама учун эълон қилинган, муҳокама 30 майгача давом этади.
7. Самарқандда «Афросиёб» поездига 5-синф ўқувчиси тош улоқтиргани маълум бўлди. «Ўқувчи ва унинг онаси билан тушунтириш ишлари олиб борилди», — дейилади Ички ишлар вазирлиги ахборотида.
Изоҳ (0)