O‘zbekiston Respublikasi Oliy Majlisi Qonunchilik palatasi deputatlari va Senati a’zolaridan iborat Ishchi guruhi 2018-yilning 20—26-aprel kunlari Navoiy viloyatining Zarafshon shahrida aholi bilan muloqotlar olib borib, shaharni ijtimoiy-iqtisodiy rivojlantirish, iqtisodiyot tarmoqlari va ijtimoiy soha ahvoli bilan yaqindan tanishdi. Bu haqda Oliy Majlis Qonunchilik palatasi deputati Farhod Quvatov Facebook’dagi sahifasida ma’lum qildi.
Aholi bilan muloqotlarda Zarafshon shahar hududidagi chiqindilar o‘z vaqtida olib ketilmayotganligi sababli chiqindilarning to‘planib qolishi natijasida atrof chiqindilar bilan ifloslanayotganligi muammosi ko‘tarildi.Shuningdek, shahar markaziy chiqindixonasi holati o‘rganilganda chiqindilar ko‘milmayotganligi natijasida 2 kilometrdan ortiq radiusda shamol orqali polietilen chiqindilar hududlarga yoyilib ketganligi va oqibatda atrof-muhitga salbiy ta’sir ko‘rsatayotganligi ma’lum bo‘ldi.
O‘rganishlar jarayonida aniqlanilishicha, chiqindilarni saralash yoki qayta ishlash yo‘lga qo‘yilmagan, chiqindixonaga olib boruvchi yo‘lning atrofida noqonuniy chiqindixonalar vujudga kelgan. Ushbu salbiy holatlar “Rohat” va “Yangi Zarafshon” posyolkalarida istiqomat qilayotgan aholining e’tiroziga sabab bo‘lmoqda.
Zarafshon shahar “Toza hudud” DUK bilan shartnoma tuzgan (15 389 abonent) aholi va yuridik (260 ta) shaxslardan o‘z vaqtida to‘lovlar undirilishiga (yanvar oyida 84,0 million, fevral oyida 83,0 million va mart oyida 118,0 million so‘m) qaramasdan chiqindilar o‘z vaqtida olib chiqib ketilmayapti. Buning asosiy sababi ishchilar (chiqindilarni yuklovchilar soni jami 8 kishini tashkil qiladi) soni va texnika (jami 4 ta maxsu texnika mavjud) yetishmasligidadir.
Texnika va ishchilar yetishmasligi sabab, chiqindilarni olib chiqib ketish bo‘yicha aholi va yuridik shaxslar bilan tuzilgan shartnomalarga asosan “Toza hudud” DUK o‘z majburiyatlarini (chiqindilarni o‘z vaqtida olib chiqib ketish) bajarmayapti. Buning oqibatida shahar atrofida noqonuniy chiqindixonalar paydo bo‘lmoqda. Bundan tashqari respublika va viloyat “Toza hudud” DUK tomonidan filiallar faoliyat yuritishi uchun yetarli sharoit yaratib berilmagan. Hattoki kanselyariya mollari ham olib berilmagan. Bunday salbiy holatlarni viloyatning barcha hududlarida kuzatish mumkin. Bir necha bor viloyat ekologiya boshqarmasi rahbariyatiga o‘rganishlarda ushbu masalalar yuzasidan e’tirozlar bildirilishiga qaramasdan ijobiy o‘zgarish bo‘lmayapti.
Yuqoridagilardan kelib chiqib, O‘zbekiston Respublikasi Ekologiya va atrof-muhitni muhofaza qilish davlat qo‘mitasi raisi B.Qo‘chqorovga Navoiy viloyatining Zarafshon shahridagi “Toza hudud” DUKni yetarlicha texnika va ishchi xodimlar bilan ta’minlash, korxonaga tegishli shart-sharoit yaratib berish, xizmat ko‘rsatish qamrovini kengaytirish, markaziy chiqindixonani talab darajasiga keltirish, chiqindilarni qayta ishlash va noqonuniy chiqindixonalarni bartaraf qilish yuzasidan amalga oshirilishi rejalashtirilgan ishlar xususida 10 kunlik muddatda asoslantirilgan yozma ma’lumot berishini so‘rab deputat so‘rovi yuborildi.
Izoh (0)