Ўзбекистон Республикаси Олий Мажлиси Қонунчилик палатаси депутатлари ва Сенати аъзоларидан иборат Ишчи гуруҳи 2018 йилнинг 20—26 апрель кунлари Навоий вилоятининг Зарафшон шаҳрида аҳоли билан мулоқотлар олиб бориб, шаҳарни ижтимоий-иқтисодий ривожлантириш, иқтисодиёт тармоқлари ва ижтимоий соҳа аҳволи билан яқиндан танишди. Бу ҳақда Олий Мажлис Қонунчилик палатаси депутати Фарҳод Қуватов Facebook’даги саҳифасида маълум қилди.
Аҳоли билан мулоқотларда Зарафшон шаҳар ҳудудидаги чиқиндилар ўз вақтида олиб кетилмаётганлиги сабабли чиқиндиларнинг тўпланиб қолиши натижасида атроф чиқиндилар билан ифлосланаётганлиги муаммоси кўтарилди.
Шунингдек, шаҳар марказий чиқиндихонаси ҳолати ўрганилганда чиқиндилар кўмилмаётганлиги натижасида 2 километрдан ортиқ радиусда шамол орқали полиэтилен чиқиндилар ҳудудларга ёйилиб кетганлиги ва оқибатда атроф-муҳитга салбий таъсир кўрсатаётганлиги маълум бўлди.
Ўрганишлар жараёнида аниқланилишича, чиқиндиларни саралаш ёки қайта ишлаш йўлга қўйилмаган, чиқиндихонага олиб борувчи йўлнинг атрофида ноқонуний чиқиндихоналар вужудга келган. Ушбу салбий ҳолатлар «Роҳат» ва «Янги Зарафшон» посёлкаларида истиқомат қилаётган аҳолининг эътирозига сабаб бўлмоқда.
Зарафшон шаҳар «Тоза ҳудуд» ДУК билан шартнома тузган (15 389 абонент) аҳоли ва юридик (260 та) шахслардан ўз вақтида тўловлар ундирилишига (январь ойида 84,0 миллион, февраль ойида 83,0 миллион ва март ойида 118,0 миллион сўм) қарамасдан чиқиндилар ўз вақтида олиб чиқиб кетилмаяпти. Бунинг асосий сабаби ишчилар (чиқиндиларни юкловчилар сони жами 8 кишини ташкил қилади) сони ва техника (жами 4 та махсу техника мавжуд) етишмаслигидадир.
Техника ва ишчилар етишмаслиги сабаб, чиқиндиларни олиб чиқиб кетиш бўйича аҳоли ва юридик шахслар билан тузилган шартномаларга асосан «Тоза ҳудуд» ДУК ўз мажбуриятларини (чиқиндиларни ўз вақтида олиб чиқиб кетиш) бажармаяпти. Бунинг оқибатида шаҳар атрофида ноқонуний чиқиндихоналар пайдо бўлмоқда. Бундан ташқари республика ва вилоят «Тоза ҳудуд» ДУК томонидан филиаллар фаолият юритиши учун етарли шароит яратиб берилмаган. Ҳаттоки канселярия моллари ҳам олиб берилмаган. Бундай салбий ҳолатларни вилоятнинг барча ҳудудларида кузатиш мумкин. Бир неча бор вилоят экология бошқармаси раҳбариятига ўрганишларда ушбу масалалар юзасидан эътирозлар билдирилишига қарамасдан ижобий ўзгариш бўлмаяпти.
Юқоридагилардан келиб чиқиб, Ўзбекистон Республикаси Экология ва атроф-муҳитни муҳофаза қилиш давлат қўмитаси раиси Б.Қўчқоровга Навоий вилоятининг Зарафшон шаҳридаги «Тоза ҳудуд» ДУКни етарлича техника ва ишчи ходимлар билан таъминлаш, корхонага тегишли шарт-шароит яратиб бериш, хизмат кўрсатиш қамровини кенгайтириш, марказий чиқиндихонани талаб даражасига келтириш, чиқиндиларни қайта ишлаш ва ноқонуний чиқиндихоналарни бартараф қилиш юзасидан амалга оширилиши режалаштирилган ишлар хусусида 10 кунлик муддатда асослантирилган ёзма маълумот беришини сўраб депутат сўрови юборилди.
Изоҳ (0)