Toshkent shahrining Sergeli tumani bilan Toshkent viloyatining Zangiota tumani kesishadigan katta yo‘l yoqasida 9 yoshli Baxtiyor Omonov onasi bilan mayda-chuyda (pista, qurut, yaxna ichimliklar) sotib kun ko‘rgan. Ular boshpanasiz qolgan. “Oila davrasida” gazetasida yozilishicha, ayolning turmush o‘rtog‘i vafot etgan, uni o‘z yaqinlari ko‘chaga haydab chiqargan. Ayol to‘qqiz yildan beri farzandi bilan sarson-sargardon, boshpanasiz, ko‘cha-ko‘yda, tentirab yurgan ayolga hatto, o‘zi tug‘ilib voyaga yetgan mahallasi mutasaddilari ham yordam berishni istamagan.
Kuzning sovuq va yomg‘irli kunlaridan birida uni yoshi oltmishdan oshgan bir mo‘ysafid Toshkent viloyati Parkent tumaniga olib ketgan. Uni o‘z qizidek ko‘rib, olti yoshli Baxtiyorning sunnat to‘yini o‘tkazgan. Bola yetti yoshga to‘lgach, shu tumandagi 35-umumta’lim maktabiga o‘qishga bergan. Shu otaxonning yordami bilan Baxtiyor o‘qishga qatnay boshlagan.
Birinchi sinfni tamomlashiga ikki oylar vaqt qolganda maktab rahbari almashgan. Yangi direktor esa Baxtiyorning hech bo‘lmasa o‘quv yilini tugatishiga ham ruxsat bermay, hujjati yo‘qligini ro‘kach qilib maktabdan chiqarib yuborgan.
Ushbu muammo Xalq ta’limi vazirligi tomonidan o‘rganib chiqilgan va ijobiy hal etilgan. Bu haqda Uz24 xabar beradi.
“To‘qqiz yoshli Omonov Baxtiyor Zangiota tumanidagi 33-sonli maktabning 2-sinfiga qabul qilindi. O‘quvchini ta’lim muassasasiga qabul qilishda zarur bo‘lgan hujjatlarni tayyorlash uchun tuman hokimligi huzuridagi Voyaga yetmaganlar ishlari bo‘yicha komissiyasiga ariza bilan murojaat qilindi.
Hozir Baxtiyor tengdoshlari bilan birga ta’lim olmoqda, yangi muhitga moslashish hamda qoldirilgan mavzularni o‘zlashtirishda unga maktab psixologi va sinf rahbari yaqindan yordam bermoqda. Shu o‘rinda, vazirlik tomonidan barcha hududiy xalq ta’limi boshqaruv idoralari rahbarlariga 7 yoshga to‘lgan har bir bola Konstitutsiyamiz bilan kafolatlangan bepul ta’lim olishga haqli ekani va bu huquqni ta’minlashda barcha darajadagi rahbarlar shaxsan mas’ul ekani yana bir bor eslatildi”, — deyiladi vazirlik ma’lumotida.
8-may kuni Facebook’dagi ijtimoiy guruh vakillari ushbu holatni o‘rganish hamda Mehriniso Omonova va uning bolasiga yordam berish uchun, ular bilan ko‘rishib ijtimoiy tarmoqlar orqali foydalanuvchilarga murojaat etgan.
Izoh (0)