Ma’lumki, Adliya vazirligi tomonidan har hafta qonun hujjatlari mazmuni, mohiyati va ahamiyati aholiga yetkazish bo‘yicha ishlar samaradorligini oshirish, yangi yondashuvlarni joriy etish maqsadida “Adliya axboroti” nomli brifing tashkil etilib kelinmoqda. Bu haqda Adliya vazirligi jamoatchilik bilan aloqalar bo‘limi “Daryo” ga xabar berdi.
Shundan kelib chiqib, joriy yilning 11-may kuni o‘tkazilgan brifingda 11 ta qonun hujjati, shu jumladan 7 ta Prezident farmon va qarorlari, 4 ta Hukumat qarori haqida ma’lumot berildi.
Brifing davomida ishtirokchilarga Vazirlar Mahkamasining 2018-yil 4-maydagi “Bolalar va o‘smirlar adabiyotini nashr etish tizimini yanada takomillashtirish va davlat tomonidan qo‘llab-quvvatlash chora-tadbirlari to‘g‘risida”gi qarori qabul qilingan bo‘lib, unga ko‘ra bolalar va o‘smirlar uchun mo‘ljallangan adabiyotlarni arzon narxlarda chop etish belgilandi.
Shuningdek, kitob savdosi bilan shug‘ullanuvchi tashkilotlar tomonidan hududlarga kitoblarni yetkazish bilan bog‘liq xarajatlarni hisob-kitob qilishda bolalar va o‘smirlarga mo‘ljallangan kitoblar narxining asossiz ravishda oshib ketishiga yo‘l qo‘ymaslik bo‘yicha zururiy choralar ko‘rilishi belgilanganligi ma’ruzachi tomonidan tushuntirildi.
Bundan tashqari, O‘zbekiston Respublikasi Prezidentining 2018-yil 4-maydagi “Ichki bozorni sement bilan barqaror ta’minlash bo‘yicha qo‘shimcha chora-tadbirlar to‘g‘risida”gi qarori hamda boshqa qonun hujjatlarida nazarda tutilgan yangiliklar yuzasidan ham ma’lumotlar taqdim etildi.
Brifingdan so‘ng, ommaviy axborot vositalari va ijtimoiy tarmoqlarda Paynet yopilayaptimi degan mazmundagi muhokamalarga sabab bo‘lgan Prezidentning 2018-yil 4-maydagi “O‘zbekiston Respublikasi aksiyadorlik tijorat Xalq banki va ‘Mikrokreditbank’ aksiyadorlik tijorat bankining moliyaviy holatini yaxshilash hamda faoliyatini yanada takomillashtirish chora-tadbirlari to‘g‘risida”gi qaroriga bag‘ishlangan matubot anjumani o‘tkazildi.
Unda OAV vakillariga AT Xalq banki mutaxassisi Uzpaynet MChJning tugatilganligini ma’lum kilib, uning o‘rnida yangi Paynet brendi ostida mazkur faoliyat davom ettirilishini ma’lum qildi.
Xalq bankida jismoniy shaxslardan yetkazib beruvchilar oldidagi o‘z pullik majburiyatlarini bajarish uchun to‘lovlar qabul qilish xizmatlarini ko‘rsatish bo‘yicha tarkibiy bo‘linma tuzilishi nazarda tutildi.
Tadbirda OAV vakillari Uzpaynet MChJda faoliyat yuritganlar taqdiri, uni amalga oshirishning zamonaviy shakllari va qulayliklari haqidagi savollar bilan murojaat qilishib, ularga javoblar olishdi.
Bundan tashqari, matbuot anjumanida Adliya vazirligi tomonidan ishlab chiqilayotgan O‘zbekiston Respublikasi Prezidentining “O‘zbekistonda so‘z erkinligi kafolatlarini kengaytirish va ommaviy axborot vositalarining rolini oshirish chora-tadbirlari to‘g‘risida”gi farmoni loyihasi yuzasidan ham fikr-mulohazalar almashindi. Jurnalistlar mazkur hujjat loyihasi bo‘yicha o‘z munosabatini bildirib, uni takomillashtirishga qaratilgan quyidagi takliflarni bildirishdi:
OAVda chop etilayotgan mualliflik materiallariga javobgarlik masalasini aniqlashtirish;
OAV so‘roviga binoan davlat organlaridan axborotlarni o‘z vaqtida moneliksiz olish;
Ijtimoiy tarmoqlarda beriladigan axborotlarning haqqoniyligini o‘rganib, ular ustidan nazoratni o‘rnatish va h.k.
Eslatib o‘tamiz, bu kabi tadbirlar haftaning har juma kuni “Taraqqiyot strategiyasi” markazida o‘tkaziladi.
Izoh (0)